10 қараша күні еліміздің 17 өңірінде ауа райының қолайсыздығына байланысты дауылды ескерту жарияланды, деп хабарлайды «Қазгидромет».
Синоптиктердің мәліметінше, көптеген аймақтарда жаңбыр мен қар аралас жауын-шашын, боран, көктайғақ, тұман және қатты жел күтіледі.
Абай облысында жаңбыр мен қар жауып, көктайғақ пен боран байқалады. Кей өңірлерде қатты жауын-шашын болады. Желдің жылдамдығы 15-20 м/с, ал батысында, солтүстігінде және орталығында 23-28 м/с дейін жетеді.
Ақмола облысында қар жауып, көктайғақ пен боран күтіледі. Желдің екпіні 20 м/с-қа дейін күшейеді.
Алматы облысында солтүстік және оңтүстік аудандарда желдің екпіні 15-20 м/с-қа дейін жетеді.
Шығыс Қазақстан облысында жаңбыр мен қар түрінде жауын-шашын болып, көктайғақ пен боран күтіледі. Кей жерлерде қатты жауын-шашын түседі. Желдің күші 23-28 м/с дейін артады.
Жамбыл және Түркістан облыстарында таулы аймақтарда тұман түсіп, жел күшейеді.
Жетісу облысында таулы аудандарда тұман, ал Алакөл маңында желдің күші 23-28 м/с дейін жетеді.
Қарағанды, Павлодар және Қостанай облыстарында қар мен жаңбыр түрінде жауын-шашын, көктайғақ және боран күтіледі.
Солтүстік Қазақстан облысында қар жауып, тұман мен көктайғақ байқалады. Желдің екпіні кей жерлерде 25 м/с дейін жетеді.
Қызылорда және Ұлытау облыстарында жаңбыр мен қар жауып, көктайғақ байқалады.
Атырау, Батыс Қазақстан және Маңғыстау облыстарында түнде және таңертең тұман түседі.
Ақтөбе облысында да кей аймақтарда тұман болады.
Мамандар тұрғындарға ауа райының қолайсыздығына байланысты сақтық шараларын сақтау қажеттігін, ал жүргізушілерге жолда мұқият болуды ескертеді.
