Даму әлеуеті жоғары ауылдар – жаңа мүмкіндіктердің бастауы
Ауылдарды дамытуда басты назар ауылдың даму әлеуеті жоғары аймақтарға аударылады. 2019 жылы анықталған даму әлеуеті жоғары елді мекендердің тізбесі 2023 жылы жергілікті әкімдіктердің ұсыныстары негізінде өзектендірілді. Бұл жаңартылған тізбе бойынша ауылдық инфрақұрылымды жаңғырту және әлеуметтік жағдайды жақсарту жұмыстары басталмақ.
Жобаларды жүзеге асыру барысында ауылдағы су, жылу, газ, электрмен жабдықтау жүйелері жаңғыртылып, тұрғындар үшін қолайлы жағдайлар жасалады. Бұл, өз кезегінде, ауылдың әлеуметтік және экономикалық дамуына оң әсерін тигізеді.
Ауыл кәсіпкерлігін дамыту – басты бағыттардың бірі
Бағдарламаның тағы бір маңызды бағыты – ауыл кәсіпкерлігін дамыту. Министрлік қазіргі уақытта ауылдық аймақтардағы кәсіпкерліктің мамандануын анықтау үшін скрининг жүргізуде. Осы орайда, 2,5%-бен шағын несие беру мен лизингтің шарттары жаңартылып, ауылдағы кәсіпкерлерге қаржылық қолдау көрсету артып отыр. Сонымен қатар, өңірлік ерекшеліктерді ескере отырып, микронесие беру тізбесі кеңейтілуде.
Жаңа қызмет түрлері мен шағын индустриялық аймақтар
Өңірлік дамуды қолдау мақсатында жаңа қызмет түрлері енгізілді. Мысалы, Абай және Шығыс Қазақстан облыстарының әкімдіктері шағын бизнестің перспективалық саласы ретінде туризмді тізімге қосты. Бұл саланың дамуы аймақтың экономикалық әлеуетін арттыруға және жаңа жұмыс орындарын ашуға мүмкіндік береді.
Сонымен қатар, ауыл тұрғындарының табысын арттыру және шығындарды қысқарту мақсатында шағын индустриялық аймақтар құру көзделіп отыр. Бұл аймақтар өнімдерді сақтау, өңдеу және сату алаңына айналып, жергілікті тұрғындарға жаңа жұмыс орындарын ұсынатын болады.
«Ауыл аманаты» бағдарламасының жаңа моделі ауылды дамытудағы үлкен өзгерістерге бастамашы болмақ. Мемлекет ауылдардағы инфрақұрылымды жаңғырту, кәсіпкерлікті қолдау және жұмыс орындарын ашу арқылы ауыл тұрғындарының өмір сапасын арттыруды мақсат етеді. Бұл шаралар ауылдық аймақтардың әлеуметтік-экономикалық дамуына жаңа серпін беріп, Қазақстанның ауыл шаруашылығын болашақта жаңа деңгейге көтеруге мүмкіндік береді.
ҚР Ұлттық экономика министрлігінің ресми интернет ресурсы
