Астанадан Талдықорғанға жоспарланған рейс тоқтатылғаннан кейін әуе компаниясына тексеріс жүргізу туралы шешім қабылданды. Осыдан кейін Қазақстанның авиация әкімшілігі Qazaq Air әуе компаниясына кешенді тексеріс жүргізеді, деп хабарлайды Азаматтық авиация комитеті.
«Жақын арада ұшу қауіпсіздігін, авиациялық қауіпсіздікті қамтамасыз ету, сондай-ақ ұшу реттілігін бақылау тұрғысынан әуе компанияға кешенді тексеріс жүргізу жоспарланып отыр», — делінген хабарламада.
27 желтоқсан сағат 11.00-де Астана-Талдықорған бағыты бойынша IQ -429 рейсі ұшуға тиіс болған. Алайда рейс ауа райына байланысты 14.30-ға дейін кешіктіріліп, кейін ұшақтағы техникалық ақауға байланысты тоқтатылды.
«Qazaq Air» әуе компаниясының рейстерді уақтылы орындауы және көрсетілетін қызметтердің сапасына қатысты жолаушылар тарапынан шағымдардың артуына байланысты «Қазақстанның авиация әкімшілігі» АҚ инспекторлары «Bombardier-Q400» әуе кемесіне жоспардан тыс жедел перрондық тексеріс жүргізді.
«Ұшу уақытын күткен жолаушыларға алкогольсіз сусын берілді. Рейстің тоқтатылуына байланысты барлық жолаушыға қолданыстағы заңнамаға сәйкес әуе билетінің құнын толық қайтару немесе алдағы күндерге қайта брондауды ресімдеу ұсынылды. 22 жолаушының билеттері 28 желтоқсанда Астана – Алматы бағыты бойынша қайта брондалды, 5 жолаушының билеті 29 желтоқсанда Астана – Алматы бағыты бойынша рейске қайта брондалды», — деп мәлімдеді азаматтық авиация комитетіндегілер.
Тексеріс барысында авиация инспекторлары рульдеу кезінде әуе винтінің жылыту жүйесінен ақау шыққанын анықтады. Анықталған ақау жойылғаннан кейін ұшақ ұшуға жіберілді. Осыған байланысты әуе кемесі 2023 жылғы 27 желтоқсанда сағат 19.52-де Астана-Петропавл бағыты бойынша IQ – 437 рейсін орындады, деп атап өтті комитет.
Фото: kursiv.media
