Бас прокурор Берік Асылов мектеп бағдарламасына «Заң және тәртіп» атты жаңа пән енгізуді ұсынды, деп хабарлайды 7-su.kz желілік басылымы.
Оның айтуынша, бұл пәнді оқытуды 7-сыныптан бастау қажет.
Бас прокурордың сөзінше, аталмыш пән жасөспірімдер арасындағы құқықтық сауаттылықты арттыруға бағытталған. Себебі көптеген кәмелетке толмаған құқық бұзушылар өз әрекеттерінің заңға қайшы екенін түсінбейді, өйткені заңдарды білмейді.
Жаңа пәнді тәжірибелі заңгерлер мен құқық қорғау органдарының ардагерлері жүргізуі тиіс. Олар тек теориялық біліммен ғана емес, өздерінің өмірлік тәжірибесімен де бөлісе алады.
— Жасөспірім заңның мәнін түсінген кезде, ол үшін заң қорқыныш емес, бағыт-бағдар болады. Ол тәртіпке үйренеді, — деді Берік Асылов.
Сонымен қатар бас прокурор Ұлттық құрылтайдың IV отырысында патриоттық рухтағы білімді ұрпақ тәрбиелеу мәселесі көтерілгенін еске салды. Құрылтай барысында Президент «Адал азамат» қағидатына сай тұлғаларды қалыптастыру қажеттігін атап өткен болатын.
— Тек дұрыс тәрбие мен заңдарды білу арқылы ғана әділетті қоғам құра аламыз, — деді Берік Асылов.
Фото: gov.kz
