Биыл жол құрылысы маусымы аясында Қазақстанда жол құрылысына қажетті 79 жаңа материал тестілеуден өткізілмек. Бұл материалдар зертханалық сынақтан өтті және қазір нақты жол учаскелерінде тексеріледі. Бұл нәтижелер қандай технологияларды қолдануға болатынын және олардың қайсысы сынақтан өтпейтінін көрсетеді. Бұл туралы ОКҚ алаңында өткен баспасөз конференциясында «ҚазЖолҒЗИ» АҚ вице-президенті Ерік Әмірбаев мәлімдеді.
Оның айтуынша, «ҚазЖолҒЗИ» ғалымдары екінші жыл қатарынан оннан астам өнімі бар «QSmart» деп аталатын автомобиль жолдарын салу, жөндеу және күтіп-ұстауға арналған заманауи технологиялар мен материалдар желісін әзірлеп жатыр. Биыл желінің мұзға қарсы реагенттері, топырақты нығайтуға арналған қоспа, битум модификаторы және асфальтбетон қоспалары, цементбетон жабындарына арналған сіңдіру құрамы, шаң басатын материалдар сынақтан өтті.
Сынақтар RCMbase Бірыңғай базасы — жол-құрылыс материалдары, технологиялар, зертханалар және өндірістік қуаттар туралы ақпарат жинайтын цифрлық платформа шеңберінде жүргізіледі. Бүгінгі таңда тізімге 153 материал енгізілді. Олардың 41-і «жасыл» мәртебеге ие болды, бұл олардың тиімділігін растайды.
«Жол жамылғысы үшін жаңа стандартқа көшу туралы айтқым келеді. Бұл — біз осы жылы енгізіп жатқан Superpave технологиясы. Ол жолдардың қолданысын арттыруға және оларды күтіп-ұстауға кететін шығындарды азайтуға сеп болады. 2025 жылы Қазақстанның түрлі өңірінде 7 тәжірибелік учаске салуды жоспарлап отырмыз. Superpave климаттық жағдайларды ескере отырып, жолды қолдану сипаттамаларына бейімделген», – деп түсіндірді спикер.
Superpave — бұл АҚШ-та жасалған асфальтбетон қоспаларын жобалау жүйесі, деп қосты ол. Жүйе климаттық жағдайларды және қозғалыс қарқындылығын ескереді.
Фото: ortcom.kz
