Азық-түлікті «Kaspi Red» арқылы сатып алу туралы пікір білдірген қаржы сарапшысы Гүлнұр Нұрланқызы бұл тәсілді қате деп санайды, деп хабарлайды 7-su.kz желілік басылымы.
Ол атап өткеніндей, азық-түлік адамға қажетті ең маңызды нәрселердің бірі болғандықтан, оған қаржылық мүмкіндігіміз жеткілікті болуы керек. Егер күнделікті тұтынатын тамаққа ақша жетпей жатса, онда бұл өмірімізде бірдеңе дұрыс емес деген сөз.
Сарапшы, егер қазіргі табысымыз тұрмысымызға жеткіліксіз болса, жұмыс ауыстыру немесе қосымша табыс табу қажет екенін айтады. Сонымен қатар, егер біліміміз табыс табуға жеткіліксіз болса, жаңа дағдыларды меңгеріп, біліктілігімізді арттыру керек екенін ескертеді. Қаржы сарапшысы инфантильдік көзқарасты – «Үкімет мені қамтамасыз етуі тиіс» деген ұстанымның балалық түсінік екенін айтады.
«Ересек адам ретінде біз өз өміріміз бен табысымыз үшін толықтай жауапты болуымыз керек. Банк бізге не ұсынса да, тек соған қанағаттанып жүрмей, табысты арттырудың басқа жолдарын іздеуіміз қажет», – деп қорытындылады Нұрланқызы.
Фото: eldala.kz
