Бейсен Құранбек атындағы Журналистер үйінде ҚР Бәсекелестікті қорғау және дамыту агенттігінің Жетісу облысы бойынша департаменті басшысының міндетін атқарушы Гүлмира Найманованың қатысуымен баспасөз мәслихаты өтті. Онда ведомствоның бірінші жартыжылдығының қорытындысы мен тауар нарығындағы кедергілерді жою жұмыстары жайлы сөз қозғалды.
Департаменттің негізгі қызметі аймақтағы бәсекелестік ортаны қорғау мен дамытуға, кәсіпкерлікке жасалатын заңсыз кедергілерді жоюға және нарық субъектілері тарапынан жіберілетін заң бұзушылықтардың алдын алуға бағытталған.
Бәсекелестікті қорғау аясында монополияға қарсы заңнаманы бұзу белгілері бойынша 2 маңызды хабарлама айтылды. Тұтынушыларға түрлі шарт қолдану дерегі өңірдегі ірі сүт өнімдері нарығынан анықталған. Атап айтқанда, «Жетісу сүт» ЖШС және «Ақ-бұлақ продукт» жекелеген сатып алушыларға объективті негізсіз түрлі талап қойған. Шартта бағаның өзгеруі мен өнімге өтінім беру мерзімі әртүрлі көрсетілген, бұл Кәсіпкерлік кодексінің 174-бабына қайшы келеді. Департаменттің ескертуінен кейін екі серіктестік те келісімшарт талаптарын заңға сәйкестендірді.
Кәсіпкерлік кодексінің талаптарына сәйкес, объективті түрде негізделген себепсіз мәні бірдей шарттарға әртүрлі талапты қолдануға жол берілмейді. Басты мақсатымыз – жазалау емес, нарық субъектілері арасында әділ бәсекелестік орнату. Анықталған бұзушылықтар бойынша уақтылы жолданған хабарламалардың нәтижесінде қос кәсіпорын да өз қателіктерін түзеп, келісімшарттарды заңнамаға сәйкес келтірді. Бұл өңірдегі өзге де өндірушілерге үлкен сабақ болуы тиіс, – деді спикер Гүлмира Найманова.
Квазимемлекеттік сектордағы 41 нарық субъектісіне жүргізілген мониторинг нәтижесінде Талдықорған қаласында 20 балабақша мен колледжге заң бұзушылықты жою туралы нұсқама берілді. Қазіргі уақытта барлық нұсқама толық орындалып, білім беру мекемелерінің қызметі құқықтық шеңберге келтірілді.
Бұған дейін тауар биржасы арқылы сатылатын картоптың ең аз мөлшері 60 тонна болатын. Сауда және интеграция министрлігінің жаңа бұйрығымен бұл шекті мөлшер 60 тоннадан 1000 тоннаға дейін ұлғайтылып, шағын және орта бизнес үшін биржалық жүктеме жеңілдетілді. Сонымен қатар, қант сатып алушылар үшін болжамды мәміленің 5% көлемінде биржалық қамтамасыз ету мөлшері талап етілетін. Енгізілген түзетулердің нәтижесінде бұл көрсеткіш 5%-дан 1%-ға дейін төмендетілді, бұл кәсіпкерлердің айналымдағы қаржысын үнемдеуге мүмкіндік берді.
Спикер өз сөзінде бұл өзгерістердің бизнес қауымдастығы үшін тиімділігін ерекше атап өтті.
Біз анықтаған және Сауда және интеграция министрлігімен бірлесе жойған екі ірі кедергі – өңірдегі азық-түлік қауіпсіздігі мен шағын және орта бизнесті қолдауға тікелей әсер етеді. Картоп жеткізудің ең аз мөлшерін 1000 тоннаға дейін ұлғайту және қант нарығындағы биржалық қамтамасыз етуді 5%-дан 1%-ға дейін төмендету кәсіпкерлеріміздің айналымдағы қаражатын құрсаудан босатып, олардың еркін жұмыс істеуіне жол ашты. Монополияға қарсы қызмет бұдан былай да бизнестің дамуына тұсау болатын әкімшілік және жүйелі кедергілермен ымырасыз күресті жалғастырады, – деді спикер.
Жарты жыл ішінде департамент 10 тауар нарығына, соның ішінде азық-түлік, кино көрсету және авиациялық отын нарықтарына ауқымды талдау жүргізген. Сондай-ақ, мемлекеттік кәсіпорындардың қызмет түрлерін кеңейтуге қатысты монополияға қарсы органның келісімін алу үшін жолданған 24 өтініш қаралды. Мемлекеттік сатып алу саласында ұқсас тауар өндірушілердің немесе жекеше кәсіпкерлік субъектілерінің бар-жоғын анықтау бойынша 9 өтініш қаралып, оның екеуіне оң қорытынды берілсе, 7 өтініштен негізсіз болғандықтан бас тартқан.
Мақпал Әділханқызы
