Президенттің тапсырмасы бойынша Үкімет азаматтардың мүддесін көздейтін баға бақылауы, салықтық жеңілдіктер мен ипотекалық бағдарламаларды дамытуға бағытталған шешімдер пакетін бекітті.
Мемлекет басшысының тапсырмасын орындау мақсатында Премьер-министр Үкімет мүшелерінің, мемлекеттік органдар мен ұйымдар басшыларының қатысуымен экономикалық реформаларды жүзеге асыру барысын ретке келтіру мәселелері бойынша кеңес өткізді.
Кеңес қорытындысы бойынша келесі шешімдер қабылданды:
Бірінші.
2025 жылғы 16 қазаннан бастап АИ-92 маркалы бензин мен дизель отыны бағасының одан әрі өсуіне инфляция деңгейі тұрақтанғанға дейін мораторий енгізілді.
Премьер-министр Энергетика министрлігіне Бәсекелестікті қорғау және дамыту агенттігімен және өңір әкімдіктерімен бірлесіп ішкі нарықты мұнай өнімдерімен тұрақты қамтамасыз ету мен баға бақылауын қамтамасыз етуді тапсырды.
Екінші.
2025 жылғы 16 қазаннан бастап барлық тұтынушылар тобы үшін коммуналдық тарифтердің өсуі 2026 жылдың I тоқсанының соңына дейін тоқтатылады.
Тарифтердің өсуін тежеу табиғи монополиялар субъектілерінің операциялық шығындарын оңтайландыру есебінен жүзеге асырылады. Сонымен қатар, тұрғын үй-коммуналдық шаруашылық нысандарындағы жөндеу жұмыстары белгіленген мерзімде толық орындалуы тиіс.
Әлеуметтік әлсіз топтарға тұрғын үй көмегі көрсету тетігі өз күшінде қалады.
Әлеуметтік маңызы бар азық-түлік тауарлары бағасының өсуіне жол бермеу үшін тұрақтандыру қорларының жұмысы күшейтіледі. Бұл мақсатта отандық ауыл шаруашылығы өндірушілерін қаржыландыру көлемі екі есеге арттырылады. Нәтижесінде СЗПТ санатына жататын өнімдердің бағасы төмендейді.
Өңірлік комиссиялар делдалдардың негізсіз әрекеттері мен сауда үстемелерін көтеру фактілерін анықтау жұмыстарын күшейтеді.
Үшінші.
Жаңа Салық кодексінің шағын және орта бизнес қызметіне теріс әсерін азайту мақсатында жеңілдетілген декларация негізіндегі арнаулы салық режимін қолдануға қатысты артық шектеулер алынып тасталады. Тыйым салынған қызмет түрлерінің тізімінде қазіргі заңнамадағыдай тек 44 бағыт қалады.
Сонымен қатар, 2026 жылғы 1 қаңтардан бастап салықтық әкімшілендіру «таза парақтан» басталады. Бұл микро және шағын бизнес үшін:
— салықтық тексерулердің;
— камералдық бақылаудың;
— мәмілелерді жарамсыз деп тану туралы сотқа берілетін істердің;
— тіркеуді жарамсыз деп тану туралы сотқа берілетін істердің күшін жоюды көздейді.
2026 жылғы 1 сәуірге дейін негізгі қарыз сомасын өтеген жағдайда салық бойынша өсімпұлдар мен айыппұлдар есептен шығарылады.
ҚҚС бойынша есепке қою шегінен асып кеткен салық төлеушілер әкімшілік жауапкершілікке тартылмайды.
Сондай-ақ, салық төлеушілер үшін салық және әділет органдарында есептен шығу бойынша камералдық бақылаусыз және салықтық тексерусіз жеңілдетілген тәртіп енгізіледі.
Бұл шаралар жаңа Салық кодексін кезең-кезеңімен енгізуге және салықтық әкімшілендіруді оңайлатуға мүмкіндік береді.
Төртінші.
Базалық мөлшерлеменің жоғарылауына байланысты екінші деңгейлі банктер тарапынан ипотекалық бағдарламаларға ұсыныстар азайған жағдайда тұрғын үй-құрылыс жинақ жүйесін қолдау шаралары қабылданады.
Осы мақсатта халық үшін жеңілдетілген ипотекалық несиелендіру көлемі екі есеге ұлғайтылады. Бұл тұрғын үйдің қолжетімділігін арттыруға мүмкіндік береді.
Аталған шаралар «Наурыз» және «Наурыз-Жұмыскер» бағдарламалары арқылы жүзеге асырылады. Кредиттеу көлемі 500 млрд теңгеге дейін ұлғайтылады.
Сонымен қатар, жыл сайын шамамен жеті мың әскери отбасыға екінші нарықтан баспана алуға мүмкіндік беретін сұранысқа ие «Әскери баспана» бағдарламасы қайта іске қосылады.
Құрылыс компанияларымен осы бағдарламалар аясында тұрғын үй салуға қатысты оффтейк-келісімшарттар жасалады. Өз кезегінде құрылысшылар үш жыл бойы бағаны тұрақты деңгейде ұстауға міндеттеледі.
Дереккөз: Primeminister.kz
