Шараның ашылу салтанатында сөз сөйлеген Талдықорған қаласының әкімі Ернат Бәзіл барша қала тұрғындарын және балаларды төл мерекесімен құттықтап, ізгі тілегін жеткізді.
– Құрметті балалар және ата-аналар! Сіздерді бала күлкісі мен шаттығына толы ерекше мерекемен шын жүректен құттықтаймын! Бала – еліміздің ертеңі, халқымыздың үміті. Әр үйде шаттық орнап, әр бала аңсаған арманына жете берсін! Балалардың күлкісі – Талдықорғанның бақыты!, – деді шаһар басшысы.
Мерекелік шарада жас шеберлердің қолөнер бұйымдары мен суретшілердің тың туындыларынан арнайы көрме ұйымдастырылды. Сондай-ақ, өнерпаздар оқушылар мен кішкентай өнер жұлдыздарының концерттік бағдарламасы жұрт назарына ұсынылды. Осы орайда Ұлы Жеңістің 80 жылдығына арналған «Балдәурен – 2025» балалар шығармашылық байқауының ақтық кезеңінің жеңімпаздары марапатталды. Жарысқа қатысушы үміткерлер ән, би, аспапта ойнау сынды номинациялар бойынша өз өнерлерін көрсетті. Байқау қорытындысы бойынша ән номинациясы бойынша бас жүлдені кішкентай Інжу Ален еншілесе, ал би номинациясында – «АйАна» би ансамблі жеңіп алды. Сонымен қатар, I дәрежелі диплом «Айбөбек» бөбекжайы, «Асқар Нәби», «Алиназ» би ансамблі, «Ачимноуль» халықтық ән-би ансамбліне табысталды.
Айдын КӘЛІМХАН
