Ұрпақ тәрбиесінің берік болуына ең басты негіз ұлттық құндылық, байырғы баба жолы деп білсек те, заманға сай тиімділікті де тиісінше пайдалана білген жөн. Өз басымның күйін осы жерде мәселеге мысал етсем, оқушы кезеңде мектепішілік шараларда белсенділік танытқанымызбен, ауылдан аттап шықпаптық, жазғы легердің не екенін де елеп-ескермептік. Соның салдарынан мектеп бітірген шақта қоғамға сіңісіп кету, адамдармен тіл табысу, жаңа достармен араласу біршама қиындық тудырды. Сонда барып жазғы легердің, демелыс маусымының қаншалықты пайдалы екенін ұғынған едік.
Рас, кейінен журналистика деген тұнық ағыспен жүзгеннен кейін ғана адамдармен еркін сөйлесіп, жылы пікірлесетін күйге жеттік. Алайда, жаз маусымы келгенде жадырап-жайнап лагерге бара жатқан оқушыларды көрген сайын, іштей сүйсінетініміз бар.
Түрлі іс-шараға белсене қатысуға, жаңа дос табуға, білімін жетілдіруге, еркін ойлау мен адамдарға мейіріммен қарауға үндейтін жазғы лагердің тиімділігі жеткілікті. Қауымдасып іс қылу, ұжымдасып қарекет етуді де осынау қызықты шақта үйренуге негіз бар. Ендеше, құндылық, салт-дәстүр, ата-баба жолын үндеумен қатар, әрбір ата-ана баласын осынау қызықты сәттен де қалтырмай, тым болмаса мектеп бітіріп кеткенше бір мәрте жібергені жөн деп ойлаймыз. Осы орайда, облыстық білім басқармасының мәліметін айшықтағымыз келеді.
Аталған сала мамандарының айтуынша биыл жазғы лагерге облыс оқушыларының 85 пайызы барады деп көзделіп отыр. Яғни,
337 жалпы білім беру ұйымдарының 1 мен 10-сыныптарындағы 121 166 оқушының 102 630-ы жазғы демалыспен қамтылады. Оның 8907-і жергілікті бюджеттен (813.5 млн.) қала сыртындағы лагерлерде 6 ауысыммен, 93 223-і мектеп жанындағы тамақтандырылмайтын лагерлерде, 500-і киіз үй лагерінде жайдарлы жаздың қызығымен тояттамақ. Осының өзі балдырғандардың бақытты шағының ең тамаша естелігі болып қалар әрі жанына сая, жүрегіне мейірім ұялатар игілікті іс деп білеміз.
Одан өзге мәлітемке сүйенсек, 118 025 бала бірегей қызметтер бойынша туристік саяхатпен, еңбекпен, шығармашылықпен, интеллектуалдық шыңдаумен қамтылады деп көзделіп отыр. Одан бөлек, республикалық бюджеттен Щучинск, Қонаев, Түркістан қалаларындағы «Балдаурен» оқу-сауықтыру орталығына, Алматы қаласындағы «Бөбек» оқу-сауықтыру орталығына, Қазақстан Халқына қоры есебінен 1113 бала Алматы облысындағы «Тау Жанашар», «Бақсы», «Достар Кэмп» лагерлеріне барып демалатынын да айта кеткен жөн.
Ал, Алатау тауының солтүстік-батыс қапталына және Жетісу облысының көрнекті жерлеріне туристік саяхаттар жасап, жоғалу қаупі бар өсімдіктерді зерттеп, сол бойынша ғылыми жобалар әзірлеуге бағытталған «Хайкинг» жобасына 750, уақытты тиімді ұйымдастырумен қатар, спорттық көпсайыс туризмі бойынша жұмыс жүргізуге бағыттайтын «Сокол» жобасына 250 бала қамтылу көзделген. Сол секілді, мектеп жанындағы лагерлер ауласында қазақ үйлер тұрғызылып, қазақтың тілін, мәдениеті мен әдебиетін, өнерді, сондай-ақ, халықтың әлеуметтік және мәдени қауымдастық ретінде пайда болуымен бірге туындаған әдет-ғұрыптар, салт-дәстүрлер, жөн-жоралғылар, ұғым-түсініктер, дағды, көзқарастарды жандандыру мақсатында өткізілетін «Ұлттық құндылықтар» жобасыа да 5 мың бала қамтылмақ.
Бір сөзбен айтқанда, облысымыздағы оқушылар балауса шақтың бал күніне тояттап, жанын сергітіп, жаңа оқу жылына жайдарлы көңіл күймен оралады деген сенімдеміз. Бұл да тәлімге, тербиеге арқау болатын игілікті дүние екені анық.
Асыл СҰЛТАНҒАЗЫ
Фото: gov.kz
