Алматы облысында «Абайлаңыз, балалар!» атты жедел профилактикалық іс-шарасы өтті. Шара 26 тамыз бен 9 қыркүйек күндері аралығында ұйымдастырылды. Аталған акция мектептерде дәстүрлі сабақтың басталуымен тікелей байланысты. Бұл туралы «Жетісу» газеті хабарлады.
Мәселен, Кеген ауданы полиция бөлімінің қызметкерлері күн сайын балалардың қатысуымен орын алатын жол-көлік оқиғаларының алдын алу және болдырмау мақсатында жұмыла жұмыс істеді. Атап айтқанда, жергілікті полиция қызметі бөлімшесінің кәмелетке толмағандар істері жөніндегі инспекторлары патрульдік полиция тобымен бірлесе аудан көлеміндегі барлық мектептерде оқушылардың жол-көлік оқиғаларына ұшырау деректерінің алдын алу мақсатында ата-аналармен, ұстаздармен және оқушылармен жол ережесін сақтау бойынша түсіндіру жұмыстарын жүргізді.
— Балалар демалыс және мереке күндері көптеген жағдайда бақылаусыз қалып жатады, олар жол жиектерінде ойнайды, жолға жүгіріп шығып жататын мезеттер де жиі кездеседі. Өкінішке қарай, сол сәтте жол-көлік оқиғасының қатысушысы болады. Жол-көлік оқиғаларынан жарақаттанудың алдын алу жағдайына одан басқа, мерзімдік факторлар да әсер етеді. Мысалы, қолайсыз табиғат жағдайлары. Барлық жүргінші балалардың қатысумен болған жол апаттарында бірінші кезекте үлкендер, ата-аналар, ұстаздар балаға жолда жүру тәртібін үйретуі қажет. Көптеген ата-аналар бұл міндетті орындамақ түгілі балалардың көзінше жол ережелерін бұзады. Ең сорақысы, балаларды жол қозғалысы ережелерін бұзуға итермелейді. Баланың қауіпсіздігін сақтау үшін ата-аналары балаларына жол қозғалысы ережелерін айтып отыруы керек, — дейді Кеген аудандық полиция бөлімі бастығының бірінші орынбасары, полиция подполковнигі Қуаныш Әбділдаев.
***
Дәл осындай түсіндіру жұмыстары Ұйғыр ауданында да жүргізілді. АПБ бастығының орынбасары, полиция майоры Тұраржан Махамет және аға тергеуші, полиция капитаны Фархат Ильясов мектепке жаңадан қадам басқан бүлдіршіндер мен ата-аналарға жол жүру ережелері бойынша түсіндіру шараларын өткізді.
— Бала қауіпсіздігі басты назарда. Олардың қауіпсіздігін қорғау мақсатында барлық іс-шараны қолданамыз, — дейді Ұйғыр АПБ бастығының тергеу жөніндегі орынбасары, полиция майоры Тұраржан Махамет.
Аталған іс-шара барысында бүлдіршіндерге жол жүру ережелері туралы оқулықтар таратылды. Ата-аналар өз кезегінде, жүргізіліп жатқан іс-шара үшін алғыстарын білдіріп, полиция қызметкерлеріне үлкен сенім артатынын атап көрсетті.
Полицейлер бала жол ережесін өз ата-аналарынан және басқа да үлкендерден алған өнегесі арқылы үйренетінін ескертеді. Сондықтан, сіз жолдағы үлгілі тәртібіңіз арқылы балалардың жол ережесін сақтап, әр түрлі жол апаттарынан сақ болуына ықпал ететініңізді ұмытпаңыз!
«ЖЕТІСУ-АҚПАРАТ»
