Балпық би ауылының экобелсенділері «Таза бейсенбі» акциясын өткізді. Оған жергілікті халық театрының актерлері және «AMANAT» партиясының еріктілері мен мүшелері қатысты.
Олар Кеңес Одағының Батыры Мұсабек Сеңгірбаев атындағы орталық саябақты қоқыстан тазартты. «Таза Қазақстан» республикалық экологиялық жобасы басталған сәттен бастап облыстағы елді мекендерден 13 мың тонна қатты тұрмыстық қалдық шығарылды. Сонымен бірге 150-ге жуық табиғи полигон жойылды.
– Мәдениет саласының қызметкерлері туған өлкенің экологиялық ортасын жақсартуға үлес қосуды ұйғардық. Егер еліміздің әрбір тұрғыны шағын Отанды абаттандыруға атсалысатын болса ұрпаққа тамаша табиғатты тарту етеміз, – дейді Көксу ауданының тұрғыны Бағлан Жүнісов.
Балпық би ауылдық округі әкімінің орынбасары Руслан Балғабаевтің айтуынша, округ бойынша 2 925 жапырақты және 265 қылқан жапырақты ағаш отырғызылған. Іс-шаралар апта сайын өтеді. Бұған қоса, оннан аса стихиялық полигон анықталып, олардың бәрі қазір жойылған.
А. Ыбырай
Көксу ауданы
