Панфилов ауданындағы бес амбулаторияның құрылысы аяқталғанына қарамастан мердігерге 5 миллион теңге көлемінде айыппұл салынды. Атап айтқанда, «Нұр-Шапағат-Құрылыс» ЖШС «Жетісу облысының құрылыс басқармасы» ММ-нің Панфилов ауданындағы бес амбулаториясы құрылысына байланысты бірқатар міндеттемені орындаса да құрылысты келісілген мерзімде аяқтамаған. Объектілерді пайдалануға беру мерзімінің бұзылу себебі – тапсырыс беруші тарапынан қаржыландырудың болмауы.
Аудиторлық тексеру кезінде құрылыс мерзімінің бұзылғаны анықталған кезде уәкілетті орган – ішкі мемлекеттік аудит департаменті себептерін анықтамастан, мән-жайды терең зерттеместен жазалау шарасын қолданған. Содан кейін «Нұр-Шапағат-Құрылыс» ЖШС өз құқықтарын қорғау үшін «Атамекен» өңірлік палатасының көмегіне жүгінген. Сөйтіп, бұл мәселе кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің талқылауына шығарылды.
Отырыста аталмыш серіктестік өкілі Дәурен Сәбитов қаржыландырудың болмауына байланысты компания жұмысты тоқтатпау және құрылысты белгіленген мерзімде аяқтау үшін банктік несиелерді ресімдеуге мәжбүр болғанын атап өтті.
– 18 шілде мен 27 қараша аралығында шарт бойынша бізге жалпы соманың 41 пайызы ғана бөлінді. Қалған 59 пайызды біз төрт ай бойы ала алмадық, бірақ нысанды мерзімінде аяқтаймыз деп ойладық. 2024 жыл соңына дейін қаржының түсетініне мүлде сеніміміз болған жоқ. Осыған қарамастан жұмысты тоқтатқан жоқпыз және құрылысты мерзімінде аяқтау үшін қолдан келгеннің бәрін жасадық, – деді Дәурен Сәбитов.
Бизнес субъектісінің өтініші қаралған соң кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес осы мәселені шешуге жәрдемдесу үшін облыс прокуратурасына және облыс бойынша сыбайлас жемқорлыққа қарсы қызметке материалдар жіберді. Сонымен бірге, облыстық кәсіпкерлер палатасы өтініш берушіге сот талқылауында құқықтық көмек көрсетеді.
Айгүл БАЙБОСЫНОВА
