Көктемнің әр күнін тиімді пайдаланғанда ғана күзде кеусені толатынын білетін облыс диқандары дала жұмыстарын бастап кетті. Бүгінде Көксу ауданындағы шаруа қожалықтары да қызу жұмысқа кірісті. Осыған орай облыс әкімі Бейбіт ИСАБАЕВ Балпық ауылдық округіндегі «Тәуелсіздік агро» ЖШС-не барып, дала жұмыстарын көріп қайтты.
– Шаруаларға мемлекеттен берілетін жеңілдік көп. Мәселен көктемгі дала жұмыстарына арналған «Кең дала» бағдарламасы арқылы 5 пайыз жеңілдетілген несиемен лизингке шаруашылық техника алуға болады. Биыл 2-ақ күннің ішінде жанар-жағармай, тыңайтқыш алдық. Сондай-ақ, былтыр 5 техника алғанбыз. Шаруа қожалығында жалпы 15 техника бар. Қазір көктемгі даланың қарбаласы басталады, – дейді Рахим Каримов.
Рахимнің негізгі кәсібі мал шаруашылығы. Шаруа қожалығында 600 бас асыл тұқымды ірі қара бар. Сондықтан 300 гектар жерге өнім тек мал азығы үшін себілуде. Қожалықтың бұдан бөлек тағы 700 гектар жері бар.
Айта кетейік, облыс бойынша ауылшаруашылығы дақылдарының егіс алқабын 510,7 мың гектарға жеткізу жоспарлануда. Егіс алқаптарын әртараптандыру шеңберінде бидай 2,9 мың, қант қызылшасы 1,5 мың, дәндік жүгері 1,1 мың, мал азығы дақылдары 0,7 мың гектарға қысқарса, арпа 5,5 мың гектарға, майлы дақылдар 1,2 мың, картоп 309, көкөніс-бақша дақылдары 268,7 гектарға ұлғаяды деп күтілуде.
Осыдан кейін облыс әкімінің бірінші орынбасары Әлібек Жақанбаев Көксу ауданындағы құрылысы жүріп жатқан нысандарды аралап, жұмыс барысымен танысты.
Алдымен Қызылтоған ауылында салынып жатқан фельдшерлік-акушерлік пунктіне барды. Құрылыс жұмыстары былтыр қыркүйек айында басталыпты. Жоба құны 180 млн. теңге. Мамандар мамыр айында кестеге сай өткізіп береміз дейді. Тек медициналық нысандағы жұмыстың 90 пайызы аяқталып, дала жұмыстары қалыпты.
– Фельдшерлік-акушерлік пунктте 15 адам жұмыс істейді. Қажетті құрылғылар мен аппараттардың барлығы алынды. Қазір соны орнатып жатырмыз. Жақында ағаш көшеттерін егеміз, – дейді «Жаркент алғыр» ЖШС-нің бас инженері Қайыр Әбілпейісов.
Келесі кезекте Балпық би ауылдық округінде салынып жатқан өрт сөндіру депосына бардық. Мердігер «АТТМ Групп» салып жатқан нысанның құрылысы 2023 жылдың сәуір айында басталған. 2024 жылдың сәуір айында беріледі деп күткен нысан әлі күнге бітпепті. Таяу күндері аяқталатын түрі де байқалмайды. Сақалды құрылысқа айналған нысанды көрген облыс әкімінің бірінші орынбасары мердігер мекемеге сын-ескертпелер айтып, жұмысты аяқтау үшін 4 ай уақыт беріп, нақты тапсырма жүктеді. Осы уақыт аралығында жұмыс нәтижесі көрінбесе сот арқылы шешілетінін жеткізді. Сонымен қатар аудан әкімі мен жауапты мамандарға «жауапсыз орындаушы» жұмысын күнде келіп қадағалауды тапсырды.
Балпық би ауылындағы екі 60 пәтерлі үйдің құрылысында жер қазу жұмыстары жүргізілуде. Бұл нысанға да облыс әкімінің орынбасары ескерту жасап, жоба облыстық сараптамадан өтуі тиіс екенін айтты. Себебі, құрылыс материалдары сапасыз. Іссапар барысында Әлібек Әскербекұлы Көксу ауданында суару жүйелерін жақсарту үшін салынып жатқан латоктарды тексерді. 2024 жылдың ақпан айында басталған жұмыс 2026 жылдың наурыз айында аяқталмақ. Әзірге салынуы тиіс 107 шақырым латоктың 60 шақырымы аяқталған.
Сондай-ақ, Қаратал, Бесқайнар ауылында салынып жатқан фельдшерлік-акушерлік пункттерінің де жұмысын көріп қайтты. Ол ауылдағы медициналық нысандар мамыр айында аяқталмақ.
Айдар ҚАЛИЕВ
Көксу ауданы
Суреттерді түсірген Жеңіс ЫСҚАБАЙ
