Мемлекет басшысы Қасым-Жомарт Тоқаев Ұлттық құрылтай отырысында ұлттық киімдерге қатысты пікірін білдірді, деп хабарлайды 7-su.kz желілік басылымы.
Президенттің айтуынша, ұлттық бірегейлікті нығайту жолында мәдениет саласының маңызы зор. Бұл ретте, әсіресе, төл мәдениетіміздің маңызды бөлігін құрайтын Әз-Наурыз мейрамының орны ерекше.
Қазіргі таңда Наурыз мерекесін атап өтуге қатысты жаңа тұжырымдама әзірленіп, еліміз Ұлыстың ұлы күнін 14 наурыздан бастап, он күн бойы атап өтетін болады. Әр күнге арнайы атаулар беріліп, жұртшылық бұл бастаманы жоғары бағалаған. Олардың ішінде «Ұлттық киім күні» қоғам тарапынан ерекше қолдау тапты, бұл ұлттық киімдерге деген қызығушылықты арттырды, – деп атап өтті Мемлекет басшысы.
Тоқаев ұлттық киімдерге деген сұраныстың артқанын, мектептерде, түрлі мекемелер мен ірі компанияларда ұлттық киімдердің кеңінен киіле бастағанын ерекше атап өтті.
«Сұранысқа сәйкес тігін цехтары ашылып, жаңа брендтер мен дүкендер пайда болуда. Ұлттық киім кию біртіндеп қалыпты құбылысқа айналуда. Бұл – өте оң үрдіс. Бет-жүзді тұмшалайтын қара киімдерден гөрі өзіміздің ұлттық киімдеріміз әлдеқайда артық. Әсіресе, әйелдер киімі өте әдемі әрі ғажап көрінеді. Ұлттық киім – біздің бірегей ұлттық болмысымыздың маңызды көрінісі. Сондықтан оны дәріптеуіміз қажет», – деді Президент.
Фото: pixabay.com
