Енді бір банктен екінші банкке ақша аударғанда ұсталатын комиссия құны артуы мүмкін. Егер ол қымбаттаса, картаны қолданғаны үшін алынатын төлем мөлшері де көтеріледі. Бұл туралы 7-su.kz ақпараттық порталы хабарлайды.
Келесі жылдан бастап банктердің барлық ақылы қызметтеріне қосымша құн салығы (ҚҚС) салынады. Экономистердің айтуынша, бұл өзгерістер комиссиялардың артуына әсер етуі мүмкін.
Қаржыгерлер қауымдастығының бас сарапшысы Рамазан Досовтың айтуынша, қосымша құн салығы барлық қызмет түріне салынбайды. Ол депозит пен несие сияқты негізгі төлемдерге қатысты емес. Салық тек комиссия алынатын қызметтерге ғана қолданылады. Қазіргі таңда карта шығару және ақша аудару операцияларын тегін ұсынып отырған банктер де бар. Оның сөзінше, ондай банктер бұл салықты төлемейді.
Сонымен қатар, ол банктердің комиссия тарифтерін өздері белгілейтінін және бұл процеске мемлекет тікелей араласпайтынын атап өтті. Сондықтан салық енгізілген жағдайда, қызмет құнының өсуі мүмкін.
«Операциялық шығындардың да өсіп жатқаны белгілі. Қазіргі таңда IT-инфрақұрылым, қауіпсіздік жүйелері және қызметкерлерге жұмсалатын шығындар артып келеді. Бұл да банктердің комиссияларының қымбаттауына әсер етеді», – дейді қаржыгер Бауыржан Ысқақ.
Ал тұрғындар банктердің комиссия алуына түбегейлі қарсы емес, алайда оның шектен тыс көтерілуіне алаңдайды.
«Онда жеке ақша алып отыру керек. Банктен шешіп алып, қолма-қол жұмсайық»,
«Қолма-қол ақшаға толық көшу де оңай емес. Бірақ бұл — халыққа ауыртпалық. Комиссия мен салықты көбейту дұрыс емес», – дейді олар.
Айта кетейік, ірі банктер биылдың өзінде-ақ, салықсыз, комиссия мөлшерін арттырған болатын. Мамандардың айтуынша, бұған базалық мөлшерлеменің өсуі себеп болған. Ал келесі жылы комиссия құнының артуына салық қана емес, қаржылық саясаттағы өзгерістер де әсер етуі мүмкін. Дегенмен сұранысты жоғалтпау үшін, банктер бағаны күрт өсірмеуі ықтимал.
