Облыстық қоғамдық кеңестің төрағасы Әсет Қыдырманов ашып, жүргізіп отырған кеңейтілген отырыста өңірдің инфрақұрылымдық даму қарқыны мен әлеуметтік нысандардағы қауіпсіздік мәселелері ашық талқыланды. Басқосу барысында ауызсу, жылу және электр жүйелерінің жаңартылуы, білім беру нысандарындағы қауіпсіздік деңгейі, архив саласындағы цифрландыру үдерісі жан-жақты қаралды.
Шараға облыс әкімінің орынбасары Диас Есдәулетов, облыстық мәслихат төрағасы Гүлнар Тойлыбаева, облыстық білім басқармасының басшысы Даурен Жүнісов, облыстық полиция департаментінің бастығы Сарқытбай Құсаинов және мәслихат депутаттары қатысты.
Энергетика және тұрғын үй-коммуналдық шаруашылық басқармасының мәліметінше, биылғы негізгі міндет орталықтандырылған ауызсуға қолжетімділікті 92 пайызға жеткізу. Бұл мақсатқа жету үшін тозған желілер жаңартылып, жаңа инженерлік инфрақұрылым орнату жұмыстары жалғасып жатыр. Ауызсудың сапасы мен қолжетімділігін арттыру – өңірдегі маңызды әлеуметтік мәселенің бірі саналады.
Кеңейтілген жиында облыстағы орта және мектепке дейінгі білім беру мекемелерінде жүргізілген қоғамдық мониторингтің қорытындылары қаралды. Мониторинг барысында бірқатар түйткілді мәселе анықталып, білім беру сапасын арттыруға бағытталған нақты ұсыныстар әзірленді. «AMANAT» партиясы Жетісу облыстық филиалының төрағасы Арыстанғали Арын баяндама жасап, атқарылған жұмыстар мен бақылау бағыттары туралы толық ақпарат берді.
Арыстанғали Қадырұлының айтуынша, облыстағы 56 білім беру нысаны 30 жылдан астам күрделі жөндеуден өтпеген. Мектептерде жылу, су және кәріз жүйелері тозғанын, шатыр, терезе және еден сапасы нашарлағанын, санитарлық тораптар ескіргенін, кей жерлерде электр жүйесі істемейтінін, асхана жағдайы нормаларға сай еместігін баяндады. Сонымен қатар, 300-ден астам бейнекамера істен шыққаны анықталған.
– Бұл жағдай білім беру процесінің қауіпсіздігі мен сапасына, санитарлық-гигиеналық нормалардың сақталуына кері әсер етеді, – деді ол.
Басқосуда архив қызметін электрондық форматқа көшіру жұмысы да оң бағасын алды. Құжаттардың цифрландырылуы – қызметті ашықтыққа жақындату, қолжетімділікті арттыру және мемлекеттік ақпараттық қорды сақтау тиімділігін күшейту бағытындағы маңызды қадам екені айтылды.
Кеңес отырысында барлық кемшілік бойынша нақты ұсыныстар әзірленіп, жауапты мекемелерге тиісті тапсырмалар жүктелді. Облыстық қоғамдық кеңесі анықталған мәселені бақылауда ұстайтынын, балалардың қауіпсіздігі мен өңірдегі қызмет сапасын арттыруға бағытталған шаралар жүйелі түрде жалғасатынын мәлімдеді.
Медет ЖҰМАБАЙ
