1990 жылы 25 қазанда Қазақ кеңестік социалистік Республикасы жоғарғы кеңесінің шешімімен «Қазақ кеңестік социалистік Республикасының мемлекеттік егемендігі туралы» декларация қабылданған болатын. Былтыр атаулы күн Мемлекет басшысы Қасым-Жомарт Тоқаевтың бастамасымен еліміздің ұлттық мерекесі қатарына қайта қосылды.
25 қазан – тарихи маңызы жоғары, Қазақстанның мемлекеттігіне ерекше ықпал еткен күн. Бұл – біздің егемендік жарияланған алғашқы мерекелердің бірі. Осы күннен бастап шегарамыз, нышандарымыз бекітілді, Конститутциямыздың негізі қаланды. Яғни, Тәуелсіздіктің алдындағы үлкен жетістігіміз болды. Міне, содан бері қазақ жұртшылығы 25 қазандағы мереке елді біріктірген, ынтымақтастырған күн деп ерекше қарсы алады. Өйткені, көптен күткен азаттықтың ақ туы желбіреген бұл қастерлі де қасиетті баға жетпес сыйға оңай жетпегеніміз баршамызға аян. Ата-бабаларымыз бостандық, егемендік алсақ, Тәуелсіз ел болсақ деп армандады. Еліміз егемендікке қол жеткіземіз деп қиын-қыстау кезеңдерді бастан өткерді. Міне, бүгінде азаттықты аңсаған ата-бабаларымыздың арманы орындалып, егеменді ел атандық. Олай болса, ата-бабамыздың асқақ арманына қолымыз жеткен бұл күн – ұлы күн.
Бұл мерекені тойлау бір жылдары тоқтап қалып еді, Мемлекет басшысының мәлімдемесіне сай аталған күн бұдан былай ұлттық деңгейдегі мерекеге ауыстырылды. Оны жұртшылық ерекше қолдады. Күнтізбеге қарасақ, аталып өтетін мерекелер аз емес. Ал Республика күнінің басқа күндерден айшықты болуы біздің қолымызда. Өйткені, айтулы мерекенің мән-маңызы зор.
Ендеше, баршамыз мемлекетіміздің іргесі мықты, шаңырағы биік болуына өз үлесімізді қосайық. Мерейлі мереке құтты болсын! Тәуелсіздігіміз мәңгілік болып, мемлекетіміз жарқырап, жайнай берсін деп тілейік. Жетісу жұртшылығын айтулы мерекемен құттықтаймын! Ел іргесі мықты, Тәуелсіздігіміз тұғырлы, берік болсын!
Ермек КЕЛЕМСЕЙІТ,
Облыстық ардагерлер кеңесінің төрағасы
Фото: ашық дереккөзден
