«Таза Қазақстан» экологиялық акциясы бастау алғаннан бері оған облыс тұрғындары, еріктілер, жастар ұйымдары, әр сала, мекеме қызметкерлері, сонымен қатар, өңір спортшылары мен өнерпаздары, жалпы 103 мыңнан астам адам атсалысып, 803 техника жұмылдырылды. Нәтижесінде 4875 тонна қоқыс шығарылып, 29514 түп ағаш отырғызылды.
Республикалық «Таза Қазақстан» экологиялық акциясы енді «Мөлдір бұлақ» апталығымен жалғасуда. Оған Жетісу облысының әр елді мекен тұрғындары белсене атсалысуда.
«Мөлдір бұлақ» – өзен, көлдер маңына тазалық жұмыстарын жүргізіп, жағажайларды қоқыстан тазартуға бағытталған экологиялық акциялардан тұрады. Осы апталықта 20 мыңға жуық адамның қатысуымен, 50 экологиялық шара өткізу жоспарланған. Демек, облыс орталығы, қала мен аудан, елді мекендер өз аумағындағы өзен-көлдердің маңында сенбілік жұмыстарын жүргізіп, бұлақ көздерін ашады. Қала аумағындағы арық жүйелерін тазартып, өзен суларының арнасын тазалайды.
Жұртқа үлгі, болашаққа өнеге болатын игі шара Талдықорған қаласының аумағындағы Қаратал өзені мен қалалық жағажай аумағын қоқыстан тазалаумен басталды. Экологиялық шараға 50-ден астам адам қатысып, 4 техника жұмылдырылды.
– Жеті өзен өрнектеген Жетісу жері табиғаттың көркемдігімен көмкерілген өңір. Бабаларымыз бізге аманаттап кеткен осы шұрайлы мекеннің сынын бұзбай, көз қарашығындай аялау біздің міндет. Облыс орталығы Талдықорған қаласы еліміздегі ең таза, көркемдігіне көз сүйінетін облыс орталықтарының бірі. Сондықтан өзіміз өмір сүріп жатқан жердің таза, саялы болуы ең алдымен өзімізге керек. Сондықтан «Мөлдір бұлақ» акциясына біркісідей атсалысып жатырмыз, – дейді қала тұрғыны Кенжебай Досымбеков.
Облысымыз Алакөл және Балқаш көлімен де әлемге танымал. Жыл сайын шомылу маусымы басталғанда осы жерге миллиондаған турист келеді. Сондықтан өзен-көлдердің бойын таза ұстап, бұлақтардың көзін ашып, еліміздің өзге аймағынан, шетелден келетін туристерге шуақты демалыс сыйлау да біздің міндетіміз. Сол үшін де «Мөлдір бұлақ» акциясына жетісулықтар барынша атсалысуда.
Камила СЕРГЕЕВА,
ЖУУ-дің 4-курс студенті
