Қазақстан шетелде сотталған азаматтарын елге қайтару процесін бастады. Бұл туралы Сенаттың жалпы отырысында Бас прокурордың орынбасары Ғалымжан Қойгелдиев мәлімдеді, деп хабарлайды 7-su.kz желілік басылымы.
Оның айтуынша, қазіргі таңда шетелде 1077 қазақстандық жазасын өтеп жатыр. Олардың басым көпшілігі – Ресей Федерациясы мен ТМД елдерінде. Осы азаматтарды елге қайтару үшін мемлекет тарапынан арнайы қаржы қарастырылған.
«Айтылған келісімнің негізгі талабы – азаматтың өз келісімін беруі. Қазіргі таңда осындай 77 өтініш келіп түсті, бұл жалпы санының шамамен 10 пайызын құрайды. Біз бұл өтініштерді қарап жатырмыз», – деді Қойгелдиев.
Сонымен қатар, отырыс барысында Сенат Қазақстан мен Кипр арасында сотталған адамдарды беру туралы заңды мақұлдады. Бұл келісімге 2025 жылдың наурыз айында Кипр Сыртқы істер министрінің Астанаға ресми сапары барысында қол қойылған болатын.
Келісімге сәйкес, сотталған адамның кем дегенде екі елдің бірінің азаматы болуы тиіс және оның жасаған әрекеті екі елдің де заңнамасына сәйкес қылмыс деп танылуы қажет. Бұл талаптар сот үкімінің орындалу жағын заңдық тұрғыда қамтамасыз етеді.
Билік өкілдері бұл қадамның гуманитарлық және құқықтық маңызын атап өтті. Жазасын өтеп жатқан азаматтардың өз елінде болуға мүмкіндігі олардың құқықтарын қорғауға және әлеуметтік қайта бейімделуге жағдай жасайды.
Фото: Егемен Қазақстан
