Талдықорған қаласының іргесіндегі шаруа қожалықтары дала жұмыстарына кірісіп кетті. Биыл егістіктен 45 миллиард теңгеге өнім алу жоспарланған. Дәл қазіргі сәтте жерге ылғал жабылып (548 гектар), тырмаланып (613 гектар), жер жырту жұмыстары (1956 гектар) жүріп жатыр. Егістіктегі іс кезеңімен жүзеге асып, жоспар бойынша орындалуда.
Қала маңында 6178 гектар егіс алқабы бар. Оның ішінде арпа-бидай, жүгері сынды дәнді дақылдар 1140 гектар, соя, сафлор сияқты майлы дақылдар 2000 гектар, қант қызылшасы 72 гектар, картоп 595 гектар, көкөністер 1227 гектар, бақша дақылдары 21 гектар, көпжылдық 1022,5 гектар бар.
Осыншама егістік жерлерін тыңайтқышпен қамтамасыз ету оңай емес. Оған қажетті минералды тыңайтқыштардың жалпы көлемі 1100 тонна. Оның ішінде аммофос 600 тонна, аммиак селитрасы 464 тонна, аммоний сульфаты 16,5 тонна, карбамид 5,5 тонна, суперфосфат 2 тонна, сульфааммофос 2 тонна және басқа макротыңайтқыштар 10 тонна. Сәуір айының алғашқы аптасында 688 тонна тыңайтқыш сатып алынды. Қалған бөлігі толығымен көктем мен жаз айларында алынады.
Ал қант қызылшасын 5 ауылшарауашылық тауар өндірушілері 72 гектарға жоспарлап отыр. Аграрлық несиелік корпорациясы арқылы жалпы 16 шаруа қожалығына 191,5 миллион теңге көлемінде арзандатылған несие берілді. Оның ішінде 3 шаруа қожалығы «Кең дала» бағдарламасы арқылы 116,7 млн. теңге, 5 шаруа қожалығы «Агробизнес» бағдарламасы арқылы 14,8 млн. теңге, 8 шаруа қожалығы «Іскер» бағдарламасымен 60 млн. теңге жеңілдетілген несие алды.
Көктемгі дала жұмыстарына қажетті 125,2 тонна дизель отынын алу үшін 22 шаруа қожалығы өтінім беріп, барлығы операторды таңдау жұмысын жүргізді. Қазір оператор мекеме ретінде таңдалған «Петрафон» ЖШС-мен келісімшартқа отыру жұмыстары жүргізіліп, барлық ауылшаруашылық тауар өндірушілері келісім жасасты.
Қала аумағындағы 132,2 шақырым суару арналарының 27,7 шақырымы темір-бетонды науалар. Былтыр 198 су тұтынушымен келісімшарт жасалып, тарифке сәйкес биыл 1 текшеметр судың бағасы 1,007 теңгеге бағаланды. Қалаға керекті су көлемі 42,5 миллион текшеметр.
Талдықорған қаласы әкімдігінің баспасөз қызметі
Фото: El.kz
