Қазақстанның бірнеше өңірінде ауа райының күрт нашарлауына байланысты ескерту жарияланды, деп хабарлайды 7-su.kz желілік басылымы.
Алдағы күндері еліміздің бірқатар аймағында күн райы құбылып, жауын-шашын, бұршақ, найзағай, қатты жел және үсік күтіледі. Осыған байланысты дауылды ескерту берілді.
Қарағанды облысында жаңбыр жауып, найзағай ойнайды. Батысы мен солтүстігінде бұршақ жаууы ықтимал. Түнде және таңертең тұман түсіп, желдің жылдамдығы 15-20 м/с дейін күшейеді. Қарағанды қаласында да найзағай мен тұман болжанып отыр.
Ұлытау облысында солтүстік, шығыс және орталық аудандарда найзағай ойнап, түнгі уақытта тұман болады. Жезқазған қаласында да осындай жағдай күтіледі.
Алматы облысында оңтүстігі мен таулы аймақтарда қатты жаңбыр, бұршақ және дауыл болады деп болжануда. Жел екпіні 24-29 м/с дейін жетуі мүмкін. Алматы мен Қонаев қалаларында найзағай, қатты жел және бұршақ күтіледі. Қонаевта шаңды дауыл болуы мүмкін.
Жетісу облысының Алакөл маңында желдің жылдамдығы 30 м/с дейін күшейеді. Таулы аймақтарда жаңбыр жауып, күн күркірейді, бұршақ түсуі ықтимал. Талдықорғанда найзағай мен қатты жел болжануда.
Қостанай облысында найзағай ойнап, жел 15-20 м/с дейін күшейеді. Кей жерлерде тұман түседі. Түнгі уақытта батыс бөлігінде үсік байқалады.
Шығыс Қазақстан облысында найзағай, бұршақ және жел күтіледі. Желдің екпіні кей жерлерде 28 м/с дейін жетеді. Өскеменде де күн күркіреп, қатты жел соғуы мүмкін.
Абай облысында найзағай мен бұршақ болжанады. Желдің екпіні 28 м/с дейін күшейеді. Семейде де осындай ауа райы күтілуде.
Павлодар облысында жауын-шашын, найзағай және бұршақ болады. Жел 23 м/с дейін жетеді. Облыс орталығында да ауа райы осындай сипатта болады.
Ақтөбе облысының солтүстігінде және Ақтөбе қаласында түнгі температура 0-2°С дейін төмендеп, үсік жүреді.
Маңғыстау облысында найзағай жарқылдап, тұман түседі.
Батыс Қазақстан облысында және Орал қаласында көріну нашарлап, тұман күтіледі.
Түркістан облысының таулы аудандарында найзағай мен қатты жел болжанып отыр.
Жамбыл облысында жаңбыр, бұршақ, найзағай және қатты жел күтіледі. Жел екпіні 28 м/с дейін жетуі мүмкін. Таразда найзағаймен қатар жел күшейеді.
Ақмола облысында жаңбыр мен қар аралас жауын-шашын болады. Түнгі уақытта тұман түсіп, үсік байқалады. Жел 15-20 м/с жылдамдықпен соғады.
Солтүстік Қазақстан облысында да жел күшейіп, түнде 2 градус аяз болады.
Фото: 7-su.kz/ Аяулым Шынгаева
