«Қазгидромет» РМК синоптиктері 10 шілдеге арналған ауа райы болжамын жариялады. Елдің басым бөлігінде аптап ыстық сақталып, бірқатар өңірде қатты жел, найзағай, бұршақ, шаңды дауыл және жоғары өрт қаупіне байланысты ескерту жарияланды, – деп хабарлайды 7-su.kz ақпараттық порталы.
Жетісу облысында солтүстік-шығыстан жел соғады. Облыстың шығысы мен солтүстігінде желдің екпіні 15-20 м/с, күндіз кей уақытта 23-28 м/с-қа дейін күшейеді. Ауа температурасы 35-37 градусқа дейін көтеріледі. Облыстың солтүстігі, шығысы және оңтүстігінде төтенше өрт қаупі сақталады.
Қарағанды облысында солтүстік-шығыстан жел соғып, оңтүстігінде екпіні 15 м/с-қа жетеді. Батысы мен оңтүстігінде ауа температурасы 36 градусқа дейін ысиды. Солтүстік және батыс аудандарда төтенше өрт қаупі сақталады.
Ұлытау облысында күндіз ауа температурасы 35-38 градусқа дейін көтеріледі. Жезқазғанда 36-38 градус аптап ыстық сақталады.
Маңғыстау облысының батысында, солтүстігінде және орталығында жаңбыр жауып, найзағай ойнайды, күндіз бұршақ түсуі ықтимал. Түнде және таңертең облыстың оңтүстік-батысында тұман түседі. Солтүстік және солтүстік-батыстан соғатын желдің екпіні 15-20 м/с-қа дейін күшейеді. Ақтауда түнде және таңертең жаңбыр мен найзағай байқалады.
Ақтөбе облысының батысында, солтүстігінде және орталығында жаңбыр, найзағай, бұршақ және дауыл болады. Түнде облыстың батысында кей жерлерде қатты жаңбыр жауады. Желдің екпіні 15-20 м/с-қа дейін жетеді. Күндіз ауа температурасы 35-38 градусқа дейін көтеріледі. Облыстың оңтүстігі мен шығысында жоғары өрт қаупі сақталады. Ақтөбе қаласында да кей уақытта жаңбыр, найзағай, бұршақ және дауыл болады.
Түркістан облысының батысы мен солтүстігінде шаңды дауыл соғады. Солтүстік-шығыстан соғатын желдің екпіні 15-20 м/с. Күндіз ауа температурасы 40-42 градусқа дейін жетеді. Облыс бойынша жоғары өрт қаупі, ал батысында, солтүстігінде және орталығында төтенше өрт қаупі сақталады. Шымкентте желдің екпіні 15-20 м/с-қа дейін күшейіп, ауа температурасы 40 градусқа дейін көтеріледі. Түркістан қаласында 40-42 градус аптап ыстық сақталады.
Батыс Қазақстан облысының солтүстігінде, шығысында және оңтүстігінде жаңбыр жауып, найзағай ойнайды. Түнде кей жерлерде қатты жаңбыр, бұршақ және дауыл байқалады. Желдің екпіні күндіз 15-20 м/с-қа дейін күшейеді. Ауа температурасы 35-38 градусқа дейін көтеріледі. Облыстың оңтүстік-батысында жоғары өрт қаупі сақталады. Оралда күндіз жаңбыр, найзағай, бұршақ және дауыл болады.
Павлодар облысында ауа температурасы 35-36 градусқа дейін көтеріледі. Облыстың батысында жоғары, ал оңтүстік-шығысында төтенше өрт қаупі сақталады.
Атырау облысында жаңбыр, найзағай және бұршақ болады. Облыстың оңтүстігінде аздаған жаңбыр жауады. Күндіз шығысында жаңбыр мен найзағай байқалады. Ауа температурасы 35-38 градусқа дейін көтеріледі. Облыстың батысында жоғары өрт қаупі сақталады. Атырау қаласында түнде аздаған жаңбыр мен найзағай өтіп, күндіз 35-37 градус ыстық болады.
Қостанай облысының батысы мен солтүстігінде жаңбыр жауып, найзағай ойнайды. Күндіз ауа температурасы 35-36 градусқа дейін көтеріледі. Осындай ыстық Қостанай қаласында да сақталады.
Алматы облысында ауа температурасы 35-37 градусқа дейін көтеріледі. Облыстың солтүстігінде төтенше өрт қаупі сақталады. Алматыда күндіз 35 градус, Қонаевта 35-37 градус ыстық болады.
Солтүстік Қазақстан облысының батысы мен солтүстігінде түнде және таңертең тұман түседі. Күндіз ауа температурасы 35-36 градусқа дейін көтеріледі. Петропавлда да тұман байқалып, күндіз 35 градус ыстық сақталады.
Астанада күндіз ауа температурасы 35-36 градусқа дейін көтеріледі.
Абай облысында солтүстіктен және солтүстік-шығыстан жел соғады. Түнде шығысы мен оңтүстігінде, күндіз облыстың басым бөлігінде желдің екпіні 15-20 м/с, кей жерлерде 23 м/с-қа дейін күшейеді. Оңтүстігінде ауа температурасы 35 градусқа дейін көтеріледі. Оңтүстік-батысында жоғары, ал солтүстігі мен оңтүстік-шығысында төтенше өрт қаупі сақталады. Семейде күндіз желдің екпіні 15-20 м/с-қа дейін жетеді.
Шығыс Қазақстан облысының шығысында өткінші жаңбыр мен найзағай байқалады. Желдің екпіні күндіз 23 м/с-қа дейін күшейеді. Оңтүстік-шығысында жоғары, ал солтүстік-батысы мен орталығында төтенше өрт қаупі сақталады. Өскеменде де жел күшейіп, төтенше өрт қаупі сақталады.
Қызылорда облысының орталығы мен шығысында шаңды дауыл соғады. Желдің екпіні 15-20 м/с-қа дейін жетеді. Күндіз ауа температурасы 40-42 градусқа дейін көтеріледі. Облыс бойынша жоғары, ал орталығы мен оңтүстік-шығысында төтенше өрт қаупі сақталады. Қызылорда қаласында да шаңды дауыл соғып, ауа температурасы 40-42 градусқа дейін ысиды.
Жамбыл облысының таулы аудандарында өткінші жаңбыр жауып, найзағай ойнайды. Желдің екпіні 15-20 м/с-қа дейін күшейеді. Күндіз ауа температурасы 38-40 градусқа дейін көтеріледі. Шығысында жоғары, ал батысы мен солтүстігінде төтенше өрт қаупі сақталады. Таразда күндіз 38 градус ыстық болады.
Ақмола облысының шығысында жоғары өрт қаупі сақталады.
