Облысымызда инфрақұрылымды дамыту бойынша бірқатар іс жүзеге асып, жоспар бойынша жүйелі орындалып келеді. Бүгінгі таңда облысымызда 1146 спорт нысаны жұмыс істейді. Биыл 3 спорт кешені қолданысқа беріліп, 6 нысанның құрылысы аяқталуға жақын. Жыл басынан бері Қаратал ауданынғы Кәлпе ауылында демеуші есебінен блокты-модульді үстел теннис кешені, Алмалы ауылында блокты-модульді спорт кешені және Алакөл ауданындағы Лепсі ауылында дене шынықтыру-сауықтыру кешені мен жатақхана пайдалануға берілді. Ал Қабанбай ауылында 80 орынды спорт кешені, Талдықорғанда гимнастика залының құрылысы қарқынды жүріп жатыр.
Қолайлы жағдай мен үлкен қолдаудың арқасында жетісулық спортшылар сан жарыста топ жарып, елдің атын айдай әлемге мәшһүр етті. Жыл басынан бері жетісулық атлеттер халықаралық және республикалық деңгейдегі жарыстар-дан 1254 медаль жеңіп алды (оның ішінде 546 алтын, 388 күміс, 453 қола). Биыл 9 халықаралық дәрежедегі спорт шебері, 57 спорт шебері, 673 спорт шеберіне үміткер мен 203 бірінші спорттық разряд берілді.
Облысымыздың спортшылары бокс, велоспорт, грек-рим, ауыр атлетика, дзюдо, таэквондо, шахмат, джиу-джитсу және самбо сынды спорт түрлерінен Азия және Әлем чемпионаттарында жүлделі орындарға ие болды.
Садақ атудан, әлем чемпионатында командалық жарыста Адель Жексембинова қола медальға ие болса, тасжолдағы велоспорттан ерлер арасындағы Азия чемпионатында (Антон Кузьмин, Евгений Федоров) командалық жарыста жеңімпаз атанса, Евгений Федоров жекелей сында алтын алды. Бокстан жастар (22 жасқа дейін) арасындағы Азия чемпионатында Нұрхан Құмарбеков, Диас Берікбай, Сила Биболсынқызы, Мария Сидоренко, Құралай Егінбайқызы және Анар Тұрсынбек чемпион болды. Грек-рим күресінен 23 жасқа дейінгі ерлер арасында өткен Азия чемпионатында Исхар Құрбаев алтын, Диас Қалтай қола жүлде алды. Ал ауыр атлетикадан жастар мен жасөспірімдер арасында азия чемпионатында облыс спортшылары Әлихан Әскербай (алтын), Ақжол Құрманбек, Матвей Макрушин (күміс), Снежана Кашкарова (қола) тұғыр төріне көтерілді. Таэквондодан жасөспірім мен жастар арасында Азия чемпионатында Дәулет Рахимоллиев пен Айару Меделбекова қола жүлдеге ие болды. Дзюдодан юниорлар арасында Азия чемпионатында Қайрат Жеңісұлы күміс, жасөспрімдер арасында Зере Талғатқызы, Жанайым Маратбек қолаға қол жеткізді. Шахматтан оқушылар арасында 19-шы Азия чемпионатында Әлихан Хажатұлы жеңімпаз атанды. Волейболдан 16 жасқа дейінгі қыздар арасында өткен Орталық Азия волейбол қауымдастығының чемпионатында жетісулық Александра Шиндова, Ульяна Кокина мен Асылы Әбітай Қазақстан Ұлттық құрамасының сапында жеңімпаз атанды. «Жетісу» әйелдер волейбол командасы биыл ел чемпионатын және Азия чемпиондар лигасын жеңіп, Бразилияда өткен клубтар арасындағы әлем чемпионатына қатысты. Ал волейболдан «Жетісу» ерлер командасы өз тарихында тұңғыш рет Қазақстан кубогын жеңіп алды.
Ардагер спортшыларымызда жарап тұр. Әлем, Азия чемпионаттарында сынға түскен жетісулық ардагерлер 3 алтын, 6 күміс, 8 қола медальға ие болды.
Бұл жетістіктің артында спортшының маңдай тері мен жаттықтырушының жоспарлы жұмысы тұр. Жетісулық жаттықтырушылардың біліктілігі талайды мойындатты. Мәселен, садақ атудан Оксана Воробьева, велоспорттан Виктор Юрайтис, бокстан Жангелді Ахметов, грек-рим күресінен Азамат Көкебаев, сурдо грек-рим күресінен Әлімжан Базарбек, пара пауэрлифтингтен Денис Орлов сияқты жаттықтырушылардың еңбегі зор.
Серік ҚАНТАЙ
