Естеріңізде болар, биылғы туризмнің қызған шағында өңір құқық қорғаушылары ерлік көрсетіп, «қауіп тырнағынан» адам өмірін арашалап қалған еді. Сол ерлік ескерусіз қалмады. Қаһармандарға Төтенше жағдайлар министрлігінің ведомстволық медалі табысталды.
15 маусымда Алакөл жағалауында қоғамдық қауіпсіздікті қамтамасыз ету бойынша қызмет атқарып жүрген полиция майоры Жақсылық Сәрсенов пен Көктұма ауылының тұрғыны суға батып бара жатқан адамдарды байқайды. Бір сәт те кідірместен көмекке ұмтылып, суға секіреді. Жедел әрі кәсіби әрекеттің нәтижесінде төрт адам құтқарылды.
Салтанатты шара Төтенше жағдайлар департаментінде өтті. Марапат құқық қорғаушыға адамдарды құтқару кезінде көрсеткен ерлігі мен батылдығы үшін берілді. Дегенмен, жиында Жақсылық Сәрсенов ең үлкен марапат – адамдардың аман қалғаны екенін жеткізді.
Жазғы туристік маусымда полиция мен құтқарушылар Алакөл және Балқаш жағалауларында тәулік бойы кезекшілік атқарып, тұрғындар мен демалушылардың қауіпсіздігін қамтамасыз етіп келеді.
Мағмар МАҚСЫМ
