Жетісу облысы Ескелді ауданы Абай, Ешкіөлмес, Қарабұлақ ауылдарындағы қатты нөсер салдарынан аула аумақтары мен тұрғын үйлерді су басудан келген шығынды өтеуге сараптама нәтижелері мен сметалық есептердің қорытындысына сай бюджеттен 403,5 млн. теңге бөлінді. Атап айтқанда, 22 үй сатып алуға 216,8 млн. теңге, 83 үйге ағымдағы және күрделі жөндеу жүргізуге 186,7 млн. теңге бөлінді, — деп хабарлайды Жетісу облысы әкімінің баспасөз қызметі.
Ескелді ауданы әкімдігінің деректеріне қарағанда, жобалық-сараптамалық және сметалық ұйыммен бірлесіп су басу салдарынан келтірілген залалды бағалау жұмыстары жүргізілген. Жалпы ауданның ауылдық елді мекендерінде 105 үй, соның ішінде Абай ауылында 11, Ешкіөлмес ауылында 28, Қарабұлақ ауылында 66 үй зардап шеккені анықталды. Зардап шеккен үйлердің 22-сі бұзылады, 83-і ағымдағы және күрделі жөндеуден өтеді.
«Бүгінгі күні аудан әкімдігі 7 үй сатып алды, үйлері бүлінген тұрғындар осы сатып алынған үйлерге қоныстанып жатыр, қалған 15 үйді сатып алу рәсімдері жүргізілу үстінде. Сондай-ақ қалпына келтіру қажет деп тапқан 83 үй иелеріне төлем жасалуда. 21 қыркүйектегі мәліметке сәйкес қалпына келтіру жұмыстарын жүргізу үшін 76 үйдің иелеріне 173,1 млн. теңге төленді. Бұл бағыттағы жұмыстар әлі де жалғасып жатыр», — деді аудан әкімдігінен.
Сонымен қатар биылғы қыркүйек айының соңына дейін жалпы ұзындығы 12,7 км болатын 7 көшеге жалпы сомасы 688,1 млн. теңгеге орташа жөндеу жұмыстарын аяқтау жоспарланып отыр. Бүгінгі таңда Ешкіөлмес, Қарабұлақ, Бақтыбай ауылдарындағы 4 көшеде жұмыстар аяқталып, Ешкіөлмес, Қаратал, Қарабұлақ ауылдарындағы 3 көшеде жұмыстар жалғасуда.
Сондай-ақ, жалпы сомасы 8,7 млн.теңгеге Абай ауылындағы Бақтыбай көшесі мен Ешкіөлмес ауылындағы М. Тынышбаев көшесіне жарық орнатылуда. Көшелердің жалпы ұзындығы – 3 км. Бұл жұмыстар осы жылдың қыркүйек айының соңына дейін аяқталуы тиіс.
