Бүгінгі таңда көп жас нашақорлыққа салынып жүр. Есірткі – ол адамның есін алып, тәуелді етіп, онсыз өмір сүре алмайтындай күйге жеткізеді. Болашақ жастардың қолында дейміз. Ал сол болашағымызға қауіп төндіріп тұрған осы есірткі екенін білсек те, одан біржола арыла алмай жүргеніміз шындық.
Есірткі – улы зат. Оның адам өміріне қаншалықты зиян екені бәрімізге мәлім. Есірткіні көбінесе қызығушылықпен немесе өміріндегі қиыншылықтарынан арылғысы келетіндер пайдаланады. Жастар арасында тәуелділік күннен күнге артып барады. Алғаш рет көргенде ләззат алып, сосын тәуелді болып, бір сәтте нашақор болып шыға келетіні қорқытады. Есірткіні шамадан тыс қолданғанның соңы зорлық-зомбылық жасау мен өлімге әкеліп соқтырады.
Кейбір адам есірткіні сатып байлыққа кенеліп жүр. Ал қаншамасы бұл істен жапа шегіп, өміріне қауіп төндіруде. Тыйым салынған осы затты тұтынатын елдер қатарында Қазақстан 8-орында тұр. БҰҰ рейтингінде Қазақстан есірткіден кісі өлімі бойынша «қара тізімнің» басында тұрған мемлекет болып саналады. Қазіргі кезде елімізде синтетикалық есірткі сату бойынша заң күшеюде. Бұл мәселені мемлекет қолға алмаса, статистика саны жыл сайын еселеніп артуы мүмкін.
Өмірді ұзарту да, қысқарту да өз қолымызда. Есірткінің салдарынан тек мінезде ғана емес, сыртқы түрде де өзгеріс пайда болады. Біріншіден, ми зардап шегеді. Уақыт өте келе ағза уланып, есте сақтау қабілеті нашарлай бастайды. «Ауырып ем іздегенше, ауырмайтын жол ізде» дейді дана халқымыз. Сондықтан зиянды заттардан аулақ болып, денсаулықты сақтайық!
Назерке НӘБІКЕНОВА,
Жетісу университетінің 3-курс студенті
Фото: inbusiness.kz
