Алматыда өткен шахматтан FIDE World Cup-тың іріктеу турнирі өз мәресіне жетті, деп хабарлайды 7-su.kz желілік басылымы.
Әйелдер арасындағы жарыс қорытындысы бойынша алғашқы үш орынды иеленген спортшылар – Афруза Хамдамова (Өзбекстан), Елназ Қалиахмет және Меруерт Камалиденова (Қазақстан). Олар 2025 жылдың 5-29 шілде аралығында Грузияның Батуми қаласында өтетін Әлем кубогіне жолдама алды.
Ерлер арасындағы бәсекеде үздік ойын өрнегін көрсеткен Алдияр Аңсат, Сәтбек Ахмединов, Әлішер Сүлейменов (Қазақстан) және Мұхаммадзохид Суяров (Өзбекстан) келесі кезеңге жолдама ұтып алды. Аталған шахматшылар 1-26 қараша аралығында Үндістанның Нью-Дели қаласында өтетін Әлем кубогінде бақ сынайтын болады.
