Талдықорғанда Шерзат Болаттың ісі бойынша сот процесі жалғасуда, деп хабарлайды 7-su.kz желілік басылымы.
Бүгінгі сот отырысында тағы да қанды түнде сотталушылармен бірге болған Эльмира Нұрбекова жауап берді. Қорғалуға құқығы бар куәгер ретінде танылған ол, сол түні «Қамажай» дүкенінің алдына көлікпен бірге келгенін растады.
Сот барысында адвокат Мейірман Шекеев Нұрбекованың тергеу кезінде қазақ тілінде жауап бергенін, ал сотта тек орыс тілінде сөйлеп отырғанын ерекше атап өтті. Бұл айырмашылық адвокаттың күдігін тудырды. Ол куәгерден:
— Сіз 5 қазан күні берген жауабыңызда Абзалдың қай жеріне пышақ сұғылғанын нақты айттыңыз. Бірақ сараптама қорытындысы тек қарашаның 11-інде шықты. Бұл ақпаратты сіз қайдан білдіңіз? — деп сұрады.
Эльмира Нұрбекова бұл сұраққа жауап бере отырып, ұсталған кезде екі күн бойы ұйықтамағанын, ас-сусыз қалғанын және жауап алу кезінде орыс тілінде сөйлеуге мәжбүр болғанын айтты.
— Бізді ұстағанда екі күн бойы ұйықтамадық. Тамақ ішпедік. Ішкі істер бөлімінде жүзге тарта адам бізден жауап алды. Не сұрағандарын толық түсінбедім. Қазақша аудармасына да назар аудармадым. Үйге қайту үшін алдыма қойған қағазға қол қоя бердім, — деді куәгер.
Сонымен қатар, Нұрбекованың қорғаушысы да оның тергеу кезінде «жүрек тұсына пышақ сұғылғанын көрдім» деген жауабы еш жерде тіркелмегенін атап өтті.
Сот отырысында Эльмира Нұрбекованың беттестіру кезіндегі бейнежауабы көрсетілді. Видеода оның қазақ және орыс тілдерінде араластырып жауап бергені анық көрінеді.
Айта кетейік, өткен аптадағы сот отырысында да Эльмира Нұрбекова тергеуде берген алғашқы жауаптарынан ауытқып, өз сөздерінде шатасқан болатын. Бұл жағдай сот процесінің барысына жаңа сұрақтар мен күдіктер туғызып отыр.
Фото: Жұмабай Мұсабеков
