Технологиялар мен ғылымның халықаралық аренасында Талдықорған қаласының Назарбаев зияткерлік мектебінің оқушылары «Infomatrix – Asia 2025» беделді байқауында жүлделі орындарға ие болып, өздерінің жоғары дайындығын көрсетті.
Бұл іс-шараға 9 елден 600 қатысушы, 100 жетекші қатысып, әртүрлі бағыттағы 210 инновациялық жоба ұсынды. Байқауға қатысушылар жасанды интеллект бағдарламалаудан бастап қысқаметражды фильмдер түсіруге дейінгі 9 негізгі санаттағы әзірлемелерін көрсетті. Сондықтан бұл жастар арасында білім мен дағдылармен алмасудың маңызды платформасына айналды. Қатысушылар өздерінің таланттарын «Computer Art», «Hardware Control», «Applied Science» бағыттарында, сондай-ақ, «Arduino» және «LEGO Relay Race» сияқты әртүрлі хакатондарда көрсетті.
ҚР Білім министрлігінің, «Дарын» республикалық ғылыми-тәжірибелік орталығы және «Білім-инновация» халықаралық қоғамдық қоры қолдауымен ұйымдастырылған байқау Қазақстандағы IT-білім берудің маңыздылығын және оның технология саласындағы болашақ мамандарды даярлаудағы рөлін байқатты. Іңкәр Құрманбаева пен Аяулым Әлиевтің 12-сынып оқушыларынан құралған Талдықорған NIS командасы «Hardware Control» санатында 1-орынға ие болды. Осы санаттағы 2-орынды 10-сынып оқушылары Сержан Қадылбек пен Ақниет Молдакерімов иеленді.
Сондай-ақ, құрамында Дария Манай мен Гүлбақыт Жексен бар команда «Applied Science Projects» санатында 2-орын алды. 7-8-сынып оқушылары Имран Маликов, Әділ Қалихан және Дәулет Мықтыбаев «Arduino hackathon»-да 3-орынға қол жеткізді. «Infomatrix – Asia 2025» байқауы қазақстандық оқушыларды жоғары деңгейде даярлаудың кезекті дәлелі болды. Олардың алдында ғылым мен технологиялар әлемінде жаңа көкжиектер ашылды.
Айгүл Байжұмақызы
