Ілияс Жансүгіров атындағы Мәдениет сарайында Халықаралық мейіргерлер күніне арналған салтанатты шара өтті. Облыстық денсаулық сақтау басқармасы ұйымдастырған мереке медицина қауымдастығы өкілдерін, сала ардагерлері мен жас мамандарды бір арнаға тоғыстырды.
Салтанатты жиын иелерін кәсіби мерекемен құттықтаған облыстық денсаулық сақтау басқармасының басшысы Асқар Садықов денсаулық сақтау жүйесіндегі орта буын медицина қызметкерлерінің ерекше рөлін атап өтіп, олардың жоғары кәсібилігіне, жауапкершілігіне және жанқиярлық еңбегіне тоқталды.
– Медбике – жай ғана мамандық емес, үлкен төзімділікті, мейірімділік пен рухани күшті талап ететін нағыз өмірлік миссия. Сіздер күн сайын науқастардың жанынан табылып, медициналық көмекпен қатар моральдық қолдау көрсетіп, адамдарға өмірдің ең қиын сынақтарын еңсеруге көмектесесіздер, – деді Асқар Маратұлы.
Облыстық денсаулық сақтау басқармасының басшысы медицина қызметкерлерінің еңбегі көбіне үлкен тәуекел мен зор жауапкершілікпен байланысты екенін атап өтті. Ол Матай ауылынан Талдықорғанға ауыр хәлдегі баланы тасымалдау кезінде қаза тапқан медицина қызметкерлерінің қайғылы оқиғасын терең құрметпен еске алып, төтенше жағдайларда кәсіби батылдық танытқан әріптестерінің еңбегін мысалға келтірді.
Жуырда жедел коронарлық синдромға шалдыққан науқасқа сәтті реанимациялық көмек көрсеткен Талдықорған дәрігерлері мен өрт кезінде бір отбасын аман алып қалған Ескелді ауданы жедел жәрдем фельдшерлерінің кәсіби шеберлігі, жеделдігі мен жанқиярлығы ерекше аталып өтті.
– Бұл мысалдар медицина қызметкерлерінің адам өмірі мен денсаулығын сақтау жолында кез келген қиын жағдайда әрекет етуге дайын екенін, олардың жоғары жауапкершілігі мен адамгершілігін айқын көрсетеді, – деді Асқар Садықов.
Салтанатты шара барысында мейіргер ісінің үздік өкілдерін марапаттау рәсімі өтті. Денсаулық сақтау саласындағы жемісті еңбегі, жоғары кәсібилігі және өңір медицинасының дамуына қосқан үлесі үшін 28 медицина қызметкері облыс әкімінің Құрмет грамотасымен марапатталды.
Марапатталғандардың қатарында Алакөл аудандық орталық ауруханасының медбикесі Дария Сахария, Көксу аудандық орталық ауруханасының медбикесі Айгүл Асылбекова, Ақсу аудандық орталық ауруханасына қарасты Қапал ауылдық ауруханасының учаскелік медбикесі Бақытгүл Жатақбаева, Талдықорған облыстық ауруханасы консультативтік-диагностикалық бөлімінің аға медбикесі Гүлбану Жарылқасынова, облыстық перинаталдық орталықтың медбикесі Сания Қасенова және №2 қалалық емхананың медбикесі Бибігүл Темірғалиева бар.
Өңірдің денсаулық сақтау жүйесінің дамуына елеулі үлес қосқан тағы 26 медбике облыс әкімінің Алғыс хатымен марапатталды.
Мейіргер ісінің ардагерлері Гүлайым Нүсіпова мен Майра Ибраеваға ерекше алғыс айтылды. Көп жылғы адал еңбегі, мамандыққа деген беріктігі және денсаулық сақтау саласының дамуына қосқан зор үлесі үшін оларға лайықты марапаттар табысталды.
Облыстық денсаулық сақтау басқармасының басшысы қазіргі денсаулық сақтау жүйесін медбикелердің кәсібилігі, жанашырлығы мен жауапкершілігінсіз елестету мүмкін еместігін атап өтті.
Мерекелік шара концерттік бағдарламамен қорытындыланды. Аймақ тұрғындарының өмірі мен денсаулығын күзетіп жүрген ақ халатты абзал жандарға деген құрмет пен ризашылыққа толы жылы атмосфера сыйлады.
Еңлік КЕНЕБАЙ
