«Айзере» ЖК басшысы Ербол Таңсықбаев қоғамдық тамақтану саласында қызмет көрсете отырып, бірнеше орта білім беру ұйымдарындағы асханаларды жалға алады. Қолданыстағы тыйымға қарамастан мектептердің бірінде ата-аналардың ас блоктарының бөлмелеріне өту жағдайының жиілеп кетуі «Атамекен» өңірлік кәсіпкерлер палатасына жүгінуге негіз болды. Әңгіме мониторингтік комиссияның мүшелігіне кірмейтін адамдар туралы болып отыр.
Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес мүшелері алдында сөз сөйлеген Ербол Таңсықбаев мектеп асханаларының үй-жайлары мемлекеттік сатып алу арқылы жалға берілетінін атап өтті. Жұмыс «СанЕжН» талаптарына қатаң сәйкестікте ұйымдастырылған, ал тамақтану білім басқармасы бекіткен үлгі мәзір бойынша жүзеге асырылады.
– Бақылау қажет және ол маңызды. Біз ынтымақтастыққа ашықпыз, алайда медициналық рұқсатсыз адамдардың ас блогына өтуі санитарлық талаптарды бұзу болып саналады. Өйткені, балалардың гепатит, туберкулез, ішек аурулары сияқты қауіпті инфекцияларды жұқтыру қаупі бар, – деді Ербол Таңсықбаев.
Сондай-ақ, мұндай әрекеттер бизнес субъектілерінің құқықтарын бұзатыны және айыппұл арқалап, қызметті тоқтата тұруға дейін апаратыны, осылайша жағдайдың нашарлауына әкелуі мүмкін екені аталып өтті. Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес төрағасы Баниямин Файзулин «Айзере» ЖК-нІң наразылығын әділ деп санады.
Осыған байланысты ол: «Біз балалар тағамы саласындағы қоғамдық бақылаудың қажеттілігін қолдаймыз. Алайда мұндай бақылаудың кез келген түрі санитарлық-эпидемиологиялық талаптарға сай болуы және кәсіпкерлердің құқықтарын бұзбауы тиіс, – деді.
Осы бизнес субъектісінің өтініші қаралған соң кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес санитарлық-эпидемиологиялық бақылау департаментіне Қаратал ауданы бойынша білім бөлімімен балаларды тамақтандыруды бақылау және ұйымдастыру бойынша түсіндіру жұмыстарын жүргізуді ұсынды.
Айгүл БАЙБОСЫНОВА
