Көлтабан ауылында жаңадан 120 орынды мектеп салынып жатыр. Мұның алдындағы білім шаңырағы 1978 жылы тұрғызылған еді. Содан бері ескі мектеп жамап-жасқалып келді. Көне оқу орны заман талабына сай емес, жиынжай, асхана, спорт зал жоқ. Балалар сыймағандықтан екі ауысыммен оқитын.
Мектеп ұжымы осы күнге дейін шағын мектепті барынша күтіп, айналасын көгалдандырып, гүлдендіріп ұстады. Ауылда алғашқы білім шаңырағын ашқан Сансызбай Жетпісбаев ұстазға сынып ашылды. Ол кабинетке мектептің тарихынан сыр шертетін жәдігерлер қойылды. Мектеп ұстаздары әртүрлі ізгі шараларды қолға алып, балалардың зейінін ашуға барын салып келеді. Мектеп директоры Жамбы Біржанова бірнеше жыл осы ауылға жаңа мектеп салу керегін айтып, ұсыныс жасаған. Шешімі былтыр табылып, Көлтабан үшін ақ түйенің қарны жарылған жыл болды. Жаңа мектепте 25 орынға арналған шағын орталық та жұмыс істейді. Құрылысты «СП NEFT» жауапкершілігі шектеулі серіктестігі жүргізіп жатыр. Бүгінде мектептің қабырғасы қаланып, жалпы жұмыстың 60 пайызы атқарылған. Мұнда 40 шақты адам жұмыс істеуде. Мектеп директоры Жамбы Құдайбергенқызы құрылыстың сапалы жүргізілуін қадағалап, өзі басы-қасында жүреді. Ауыл тұрғыны, құрылысшы, Кенжебек Омаров та әр кірпіштің дұрыс қалануын қадағалауда. Жоспар бойынша жұмыс қазан айының басында аяқталуы тиіс. Серіктестік бригадирі Сәкен Сәбитов жұмыс ғимараты 1 қыркүйекте пайдалануға берілетінін айтты.
Биылға дейін Көлтабанда орталау мектеп болған. Жақында облыс басшысы Бейбіт Исабаев арнайы барып көріп, оқу бағдарламасын 11 жылдыққа алмастырып, оқу ордасын орта мектепке ауыстыру жайлы тапсырма берді. Себебі, 9-сыныптан кейін ауыл балалары 10-11-сыныпты оқу үшін ата-аналарынан алшақтап, жан-жаққа кететін. Осындай жағдайға байланысты балалардың көбі басқа жақта оқып жатыр. Бұл да ауыл халқы үшін өзекті мәселе. Аймақ басшысының бұл сөзі көлтабандықтарды қатты қуантты.
Көлтабан тоғыз жолдың торабындағы ауыл. Болашақта Балқаш көлінің инфрақұрылымы жақсарып қызмет көрсету аясы кеңейіп, туризм дамыған кезде жол үстіндегі Көлтабан да өркендейтіні сөзсіз. Жазда елді мекен тұрғындары қарбыз-қауын өсіріп, көлге демалуға бара жатқандарға сатып нәпақасын табуда. Көкөніс күндіз-түні өтеді.Балғын, дәмді өнімді алушылар қатары жыл санап өсіп келеді. Болашағы жарқын жаңа мектептің іші балаға толатынына сенім мол. Біраз жылда ауылға көшіп келушілер қатары өсетіні де сөзсіз.
Бүгінде құрылысшылар ғимаратпен қатар ауладағы футбол, волейбол алаңдарын да бір мезгілде жасап жатыр. Бір айта кетерлігі, үш қабатты мектепте лифті де жұмыс істейтін болады.
Гүлжан ТҰРСЫН
