Кербұлақ ауданында ауыл әкімі ұл баланы көлікпен қағып өлтірді, деп хабарлайды 7-su.kz желілік басылымы Azattyq Ruhy ақпараттық агенттігіне сілтеме жасап.
Қоғам белсендісі Сандуғаш Дүйсенованың айтуынша, Кербұлақ ауданына қарасты Көксу ауылдық округінің әкімі Әлия Бақтиярова рульде болған. Оқиға орнына келген Полиция департаментінің қызметкерлері мерт болған оқушының 12 жаста екенін анықтаған.
«Оның өліміне әкім Әлия Маратқызы Бақтиярова кінәлі. Ол Ескелді ауданы Биғаш ауылының маңында 2 қарашада кешке баланы көлікпен қағып кеткен. Салдарынан 9-сыныпта оқитын Асыл Тұрсынбай апат орнында қайтыс болды. Көліктің рулінде Кербұлақ ауданы Көксу ауылдық округінің әкімі Әлия Бақтиярова болған», – деді белгілі журналист, қоғам белсендісі Сандуғаш Дүйсенова.
Ал апат орнына келген полиция қызметкерлері хаттама толтырып, көлікті айыппұл тұрағына қойған. Қоғам белсендісі ұл баланы қағып өлтірген әйелдің тіптен уақытша ұстау изоляторына қамалмағанын жазды. Мезгілсіз қайтыс болған оқушы демалыс күні жер қойнына тапсырылды.
«12 жастағы жасөспірім Hyundai Greta көлігінің дөңгелегіне түсіп қайтыс болды. Машинаны 39 жастағы әйел басқарғаны анықталды. Аталған оқиға бойынша сараптама тағайындалып, ҚР Қылмыстық кодексінің 345-бабы бойынша соталды тергеу басталды. Шетел көлігі айыппұл тұрағына қойылды. Кәмелеттік жасқа толмаған балаға қатысты болған жол апаты облыстық Полиция басқармасынның өндірісіне алынды. Қамауға алу туралы полиция емес, сот шешім шығарады», – деп хабарлады Жетісу облыстық ПД баспасөз қызметі.
Айта кетейік, Әлия Бақтиярова 2014 жылдан бастап лауазымды қызметке тағайындалған. Ол Көксу ауылдық округін 2018 жылдан бері басқарып келеді.
Фото:Тұрар Қазанғапов
