Киік мүйізін экспорттауға қатысты нормативтік-құқықтық актілер әзірленіп жатыр. Бұл туралы Экология және табиғи ресурстар министрлігі мәлімдеді, – деп хабарлайды 7-su.kz ақпараттық порталы.
Ведомствоның хабарлауынша, қазіргі уақытта киік мүйізін өткізудің нақты тетігі толық айқындалмаған. Осыған байланысты экспорттау тәртібін реттейтін құжаттар пысықталып, тиісті құқықтық негіздер қалыптастырылуда.
– Осыған байланысты министрлік қазіргі кезде киік мүйіздерін өткізу тәртібін реттейтін тиісті нормативтік-құқықтық актілерді әзірлеу және қабылдау бойынша жұмыс жүргізіп жатыр, – делінген министрліктің хабарлауында.
Еске салсақ, өткен жылдың желтоқсан айында елімізде киік мүйізін экспорттау жоспарланып отырғаны хабарланған болатын. Бұл бастама табиғи ресурстарды тиімді пайдалану және биоалуантүрлілікті сақтау бағытындағы шаралармен байланысты қарастырылып отыр.
Биыл наурыз айында Экология және табиғи ресурстар министрі Ерлан Нысанбаев киік мүйізінен түсетін қаражаттың қандай мақсаттарға жұмсалатынын нақтылаған еді. Оның айтуынша, түскен қаржы биоалуантүрлілікті сақтау, киіктерді қорғау және саланы материалдық-техникалық жағынан қамтамасыз етуге бағытталмақ.
Қазіргі таңда Экология министрлігі Сауда министрлігімен бірлесіп экспорттық жүйені реттеу мәселесін пысықтап жатыр. Тиісті механизмдер әзірленгеннен кейін ғана киік мүйізін сыртқы нарыққа шығару тәртібі нақты бекітілетін болады.
