Әлемдік кассада 1 миллиард долларлық межені бағындырған 2026 жылдың алғашқы кино туындысы белгілі болды, – деп хабарлайды 7-su.kz ақпараттық порталы Tengri Life мәліметтеріне сүйеніп.
Шетелдік беделді Variety басылымы таратқан ақпаратқа сәйкес, Illumination, Nintendo және Universal студияларының бірлескен өнімі – «Супер Марио: Галактикалық кино» анимациялық фильмі прокаттың оныншы аптасында 1 миллиард доллар жинап, рекорд орнатты. Өндірістік бюджеті шамамен 110 миллион долларды құраған жоба орасан зор кассалық түсімінің арқасында биылғы жылдың ең табысты туындыларының біріне айналды.
Жаңа анимациялық туынды жарыққа шыққаннан кейін «Super Mario» жобаларының жалпы кассалық жинағы 2 миллиард доллардан асты. Франшиза кассалық түсім көлемі бойынша әлемдегі ең ірі он анимациялық топтаманың қатарына еніп, тоғызыншы орынға тұрақтады. Бұған дейін шыққан «Ағайынды Супер Марио» фильмі прокатта 1,3 миллиард доллар жинап, әлемдік хитке айналған еді. Illumination студиясы көрерменге «Гадкий я», «Үй жануарларының құпия өмірі», «Зверопой» сияқты танымал туындылары арқылы жақсы таныс.
Сиквелде бас кейіпкерлер Марио, Луиджи, ханшайым Пич пен Тоадтың жаңа шытырман оқиғалары баяндалады. Анимациялық фильмдегі кейіпкерлерді Крис Пратт, Бри Ларсон, Джек Блэк сияқты Голливудтың танымал актерлері дыбыстаған.
«Супер Марио» – Nintendo компаниясының аттас видеоойындар сериясына негізделген әлемге танымал медиафраншизасы. Оқиғаның басты кейіпкері Марио есімді су құбыршысы інісі Луиджимен бірге Саңырауқұлақ патшалығын сан мәрте қауіптен құтқарады. Ондаған жылдар ішінде бренд аясы кеңейіп, көптеген ойындарды, мультсериалдарды, комикстер мен толықметражды фильмдерді қамтитын үлкен мәдени құбылысқа айналды.
