Көксу ауданында сырғанақ тебуге барған 10 жастағы қыз бала көз жұмды.
Оқиға күндізгі сағат 13:00-дер шамасында Мұқыры ауылында болған. Көксу ауданының әкімдігі оқыс оқиғаны растады.
— Бүгінгі күні сараптама тағайындалды. Тергеу жүргізіліп жатыр. Алдын-ала болжам бойынша қыз бала басынан жарақат алған, — деді Көксу ауданы әкімінің баспасөз хатшысы Айгүл Айманбекова «Қазақпаратқа» берген сұхбатында.
Оқиға орнында көз жұмған бала — Талдықорған қаласының тұрғыны. Ол сырғанаққа анасымен бірге барған. «Қайғылы жағдай болған жер жеке шаруашылыққа тиесілі. Бұл аумақта сырғанақ тебуге рұқсат етілмеген. Әкімдік тарапынан тұрғындарға түсіндіру жұмыстары жүргізіліп жатыр», — деп толықтырды А.Айманбекова.
«ЖЕТІСУ-АҚПАРАТ»
Сурет — ғаламтордан
