Ескелді ауданына қарасты Көкжазық ауылында маңызды саяси науқан өте жоғары деңгейде өтуде, – деп хабарлайды 7-su.kz ақпараттық порталы.
Бүгін таңертеңнен бастап азаматтық ұстанымын айқын көрсеткен тұрғындар Құрылтай депутаттарын сайлауға қатысу үшін №102 сайлау учаскесіне топ-тобымен келді. Ауылдың 100-ге жуық тұрғыны бір мезетте сайлау учаскесіне келіп, өз таңдауын жасады. Тұрғындардың бірлесіп дауыс беруі олардың елдің қоғамдық-саяси өміріне және туған өлкенің одан әрі өркендеуіне деген шынайы қызығушылығының жарқын көрінісі болды.
Жергілікті жұртшылық үшін Құрылтай депутаттарын сайлаудың маңызы өте зор. Себебі Құрылтай – халықтың мүддесін қорғайтын, өзекті мәселелерді шешуге жол ашатын маңызды алаң. Дауыс берушілер ауылдық жерлерде инфрақұрылымды дамыту, ауыл шаруашылығын қолдау, жаңа жұмыс орындарын ашу және жастарға тиісті жағдай жасау бағыттары басты назарда болуы керектігін жеткізді.
– Біз өз елімізде тұрып, еңбек етіп, ұрпақ тәрбиелеп жатырмыз. Ауылымыз бен ауданымыздың әрқашан дамығанын қалаймыз. Сондықтан сайлауға келіп, саналы таңдау жасауды азаматтық борышымыз деп есептейміз, – дейді ауыл тұрғындары.
Сондай-ақ аға буын өкілдері жастардың қоғам өміріне жастайынан белсенді араласуы маңызды екенін атап өтті. Жас ұрпаққа үлгі көрсету арқылы елдің болашағы әрбір азаматтың қатысуына байланысты екенін ұғындыру басты мақсаттардың бірі. Сайлау учаскелері кешкі сағат 20:00-ге дейін жұмыс істейді.
