Жетісу өңіріне арнайы іссапармен келген Сенат депутаттары Ғалиасқар Сарыбаев пен Амангелді Есбай Көксу ауданының тұрғындарымен кездесіп, тыныс-тіршілігін көрді.
Халық қалаулыларына облыстық мәслихат төрағасы Гүлнар Тойлыбаева мен аудан әкімі Дәулет Халелов өңірдегі негізгі инфрақұрылымдық және әлеуметтік жобалардың жүзеге асырылу барысы туралы есеп берді.
Ауыл тұрғындарының бос уақытын сапалы өткізуге баса назар аударған депутаттар Ақтекше ауылындағы «ЖетісуСтройСервис» ЖШС салған жаңа мәдени-демалыс кешенін, «Жастар» саябағын аралады. Сонымен қатар, аталған елді мекенде мердігер «DILIGENTOO1» ЖШС құрылысын жүргізген балалар алаңының жұмысын көрді.
Сапардың маңызды бөлігі өңірді газдандыру жұмыстарының нәтижесін тексеру болды. Делегация мүшелері Көкбастау ауылында бір отбасына барып, олардың көгілдір отынға қосылу барысын бағалады. Қаблиса ауылдық округіндегі 23 тұрғын үй көгілдір отынмен қамтылыпты. Газ жүйесін орнату жұмыстарын «МБК Құрылыс» ЖШС жүргізген.
Осыдан кейін ат басын Жарлыөзек ауылдық округіне қарасты Бозтоған ауылына бұрып, ауыл тұрғындарымен кездесті. Басқосу барысында тұрғындардың ұсыныстары мен өтініштерін тыңдады. Сондай-ақ, жол жөндеу мамандарымен және мердігерлермен ауданның жол инфрақұрылымының бүгінгі жай-күйін жан-жақты талқылап, одан әрі жетілдіру жоспарын бекітті.
Сапар соңында Ғалиасқар Сарыбаев пен Амангелді Есбай ауданның тұрақты дамуына қол жеткізу үшін мемлекеттік органдардың, жергілікті атқарушы органдардың және тұрғындардың өзара тығыз қарым-қатынаста болуының маңыздылығына тоқталып, көтерілген мәселелер мен ұсыныстар ескерілетінін жеткізді.
Айдар ҚАЛИЕВ
