Қай салада болмасын кәсіби біліктілікті шыңдау мақсатында мамандар арасында өзара бәсекелестік болуы шарт. Қабілеті мен қызығушылығы жоғары адам ғана өндіріске араласа алады. Ал Worldskills чемпионаты жұмысшы мамандықтарының әлеуетін арттыруға зор ықпал ететін ілкімді жоба.
Облыстық білім басқармасының жұмыс жоспарына сәйкес өткізілетін аймақтық кәсіби шеберлік чемпионатының мақсаты техникалық және кәсіптік білім беруді кеңінен насихаттау, оның жастар арасындағы беделін арттыру, сондай-ақ жыл соңында Астана қаласында өтетін Ұлттық чемпионатқа студенттерді іріктеу.
– Қазіргі таңда аймақтық Х чемпионат өтіп жатыр. Осы жылдың бір ерекшелігі жаңа құзіреттіліктердің қосылуы. Солардың бірі дрондарды басқару «Дронрэйсинг» және видеомонтаж бойынша сайысы. Балалар өз қабілеттерін 3 күн бойы ортаға салады. Ең жақсы балл алған студенттер республикалық чемпионатқа аттанады, – дейді политехникалық колледждің педагогі Назар Абылсынов.
Аймақтық кәсіби шеберлік сайысы 21-25 сәуір аралығында Талдықорған жоғары политехникалық, сервис және технология, аграрлы-техникалық колледждерінің, І. Жансүгіров атындағы Жетісу университеті колледжінің және Жетісу облысының кәсіпкерлер палатасының базаларында өтеді.
– Биыл чемпионатқа екінші рет қатысудамын. Осы жолы дайындығымды шыңдап келдім. Жоғары нәтиже көрсетіп, республикада облысымыздың атын шығарғым келеді. Мен «Ақпараттық кабелдік желілер» құзіреттілігі бойынша сынға түспекпін. Былтыр екінші орынды жеңіп алғанбыз. Биыл бірінші орыннан көрінеміз деп сенемін, – дейді жарыс қатысушысы Әсет Рахатұлы. Байқауға ШҚО, Жамбыл, Алматы облыстары мен Алматы қаласы колледждерінен ғана емес, сонымен қатар көршілес Қырғызстан Республикасынан да қатысушылар келген.
Айта кетейік, аймақтық чемпионатқа облысымыздан және өзге өңірлерден 155 студент 25 бағыт бойынша қатысуда.
Шалқар АҚСАҚАЛ
