Бейсен Құранбек атындағы журналистер үйінде жұмыспен қамтуды үйлестіру және әлеуметтік бағдарламалар басқарманың басшысы Ермек Мизамбаев сұхбат беріп, мүгедектігі бар адамдарға жасалып жатқан жағдай туралы айтты.
Спикердің сөзінше, облыста 25 мың мүгедектігі бар азамат тіркелген. Бүгінде облыс, аудан, қала әкімдеріне мүгедектігі бар азаматтар мәселелері жөніндегі штаттан тыс кеңесшілері тағайындалып, жұмыс атқаруда. Өткен жылы техникалық оңалту құралдарымен мүгедектігі бар 16,8 мың адам қамтылған. Оның ішінде шипажай-курорттық емдеумен 3762, арнайы қозғалыс құралдарымен 758, протездік-ортопедиялық бұйымдармен 2333 адам қамтамасыз етілген.
Көптеген нысанда қоларбамен жүретін мүмкіндігі шектеулі адамдардың мекемеге кіріп-шығуына арнайы жол жасалмаған еді. Мұның да біразы қалыпқа келтірілді. Биыл 17 мың адам оңалту құралдарымен қамтылады. Жоспарға сәйкес 2027 жылға дейін өңірдегі 1120 нысанды бейімдеу жоспарланған. Облыс бойынша мүмкіндігі шектеулі адамдарға бірнеше «Инватакси» тоқтаусыз қызмет көрсетеді. Мүгедектігі бар балаларға Алакөл, Сарқан, Панфилов, Қаратал аудандары мен Талдықорған қаласынан арнаулы әлеуметтік қызмет көрсететін 5 жаңа орталық ашылды. Жалпы облыста ерекше қамқорлықты қажет ететін адамдарға көмек көрсету жақсы жолға қойылғаны баршаға мәлім. Мысалы, Ақши ауылында орналасқан резиденция ғимаратына жөндеу жұмыстары жүргізіліп, «Жансая» жазғы лагері ашылды. Биыл бұл жерде 160 ерекше бала жеке көмекшесімен тегін демалатын болады. Болашақта Балқаш көлінің жағалауында да осындай лагерь салу жоспарлануда.
Ермек Арынханұлы Талдықорған қаласында «Асар» спорттық-оңалту кешенімен бірлесіп мемлекеттік әлеуметтік тапсырыс шеңберінде 445 мүгедектігі бар азамат оңалту шараларымен қамтылып жатқандығын айтты.
«Асар» спорттық-оңалту орталығы биыл мүгедектігі бар адамдарға үй жағдайында көшпелі оңалту қызметтерін көрсету бойынша республика бойынша алғаш болып әлеуметтік маңызы бар жобаны іске қосқаны көпшілікті қуантты. Сұхбат барысында мұндай шаралардың жалғаса беретіні сөз болды.
Гүлжан МҰҚАШҚЫЗЫ
Фото: dszn.ru
