Жетісу облысының орталығында «Көңілді қыс Талдықорған» спорттық іс-шарасы өтті. Қалалық дене шынықтыру және спорт бөлімінің бастамасымен қолға алынған жарысқа жалпы 8 команда, 100-ге жуық аймақ тұрғындары мен жасөспірім қатысып, бақ сынады.
Жарыс басталар алдында сөз алған Талдықорған қаласы әкімінің орынбасары Жеңіс Андабеков сайыскерлерге сәттілік тілеп, жылы лебізін жеткізді. Шара аясында өңір өнерпаздары көпшілікке концерттік бағдарлама ұсынып, көтеріңкі көңіл-күй сыйласа, жауаптылар спорттың әр түрінен ұйымдастырылған эстафеталық ойындар мен шағын футболдан өткен сайыстың жеңімпаздарын анықтап, арнайы Алғыс хат, медаль, кубок және бағалы сыйлықтармен марапаттады.
– Бүгін қала жағажайында жиналған қауымның қарасы мол болды. Біз балалармен бірге әуезді ән, күмбірлі күй тыңдап, сырғанақ теуіп, демалыс күнімізді таза ауада ерекше өткіздік. Шара қызықты әрі өте жоғары деңгейде. Көпшіліктің көңілінен шығатын осындай шараны ұйымдастырған қала әкімдігіне айтар алғысымыз шексіз», – дейді аймақ тұрғыны Айсұлу Сұлтанқызы.
Айдын КӘЛІМХАН
