Талғар қаласында орын алған жаппай төбелес салдарынан қаза тапқан мектеп оқушысы Шерзат Полаттың анасы сот отырысында жан тебірентерлік куәлік берді. Ол ұлының өліміне себеп болған жағдайды көзімен көргенін айтып, оқиғаның сұмдығын жасыра алмады, деп хабарлайды 7-su.kz желілік басылымы.
Оқиға биыл Талғардағы «Камажай» дүкені маңында болған. Жәбірленуші тараптың айтуынша, сол күні әйел адам қайын енесімен бірге дүкенге бара жатқан. Дәл сол сәтте 10–15 адамнан құралған топ арасында төбелес басталып кеткен.
«Сол сәтте біреу ‘Жасаңдар!’ деп айқай салды да, барлығы жабылып, менің балама тап берді», – деді марқұмның анасы.
Оның айтуынша, өзі ұлына көмек көрсетпек болғанда, екі жігіт жолын бөгеп, оны ұстап тұрған. Қаскөйлер әйелге егер араласса, оны да өлтіреміз деп қорқытқан.
«Менің баламды аяусыз тепкілей бастады. Аузынан қан кетті, басынан бірнеше рет соққы алды. Жанұшырып жүгіріп барып, үстіне жабысып, денеммен қорғауға тырыстым, бірақ бәрі кеш еді», – дейді көз жасына ерік берген ана.
Бұл оқиға қоғамда үлкен резонанс тудырып, жасөспірімдер арасындағы зорлық-зомбылық мәселесін қайтадан күн тәртібіне шығарды. Қазіргі уақытта аталған іс бойынша тергеу жалғасуда, сот процесі әлі аяқталған жоқ. Шерзат Полаттың анасының сөзі жәбірленуші тараптың негізгі куәліктерінің бірі ретінде тіркелді.
Еске сала кетейік, бұл оқиға әлеуметтік желілерде қызу талқыланып, көпшіліктің ашу-ызасына себеп болды. Қоғам белсенділері мен құқық қорғаушылар жастар арасындағы қылмыстың алдын алу шараларын күшейтуді талап етуде.
Коллаж: Ulysmedia
