Сәуір айының 16-сы Тұрғын үй-коммуналдық шаруашылық саласы қызметкерлерінің кәсіби мерекесі. Осыған орай қиын да қажырлы еңбек иелері төл мерекелерін тойлады. Салтанатты шара облыстың әр өңірінде өтті.
Халықты жылу, электр энергиясы, сумен қамтамасыз етіп, көшелердің тазалығын қадағалайтын мамандар күні Талдықорғанда да аталып өтті. Салтанатты жиында облыстық энергетика және тұрғын үй-коммуналдық шаруашылық басқармасының басшысы Айдос Бекетаев:
– Елімізде алғаш рет тойланып жатқан мереке болғандықтан біз су құбыры, көркейту сынды әр сала мамандарын шақырдық. Сіздердің еселі еңбектеріңіздің арқасында көшелер таза, тұрғын үйлерде жылу мен жарық бар, – деп облыстағы атқарылып жатқан жұмыстарды баяндап, ізгі тілегін білдірді.
Осыдан кейін сала майталмандары облыс әкімінің орынбасары Әсет Қанағатовтың және энергетика және тұрғын үй-коммуналдық шаруашылық басқармасының Алғыс хаттарымен марапатталды.
Жиын соңында сала мамандары еселі еңбегін елеп-ескерген облыс әкімдігіне алғыс білдірді.
– Менің КСК-да жұмыс істегеніме 15 жылдан асты. Осы уақыт аралығындағы жұмысымды бағалап, марапаттап жатқан жандарға алғыс білдіремін. Әріптестерімді төл мерекелерімен құттықтаймын, – деді «Арман – 2» мүлік иелері бірлестігінің басшысы Назгүл Бейсенбекова.
Айта кетейік, облыс бойынша 60-жуық қызметкер, Талдықорғандағы шарада 16 маман марапат төрінен көрінді.
Айдар ҚАЛИЕВ
Фото: tengrinews.kz
