Мектептегі менторлардың жұмысы оқушының бағыт-бағдарын айқындап, келешекте қоғамға қызмет ететін жанды қалыптастыру үшін ерекше жоба. Талдықорған қаласының әкімі Ернат Бәзіл мектептерде жұмыс істейтін менторларды Салтанат сарайындағы «Дөңгелек үстелде» қабылдады. Олардың өткен оқу жылындағы еңбектері сараланып, жоспар айтылып, пікірлер тыңдалды.
Еркін форматта өткен кездесуде әуелі әкім Ернат Дүйсенбекұлы сөз алып: «Өздеріңізге белгілі, облыс басшысы Бейбіт Исабаевтың бастамасымен 2023 жылы «Әдеп-құқық жұмысы жөніндегі ментор» жобасы жүзеге асырылған еді. Бүгінде облыс бойынша 120, ал Талдықорған қаласы бойынша 31 ментор істейді. Олар мамандық таңдау, құқықтар мен міндеттер, нашақорлық пен лудомания, саламатты өмір салты, зорлық-зомбылық және репродуктивті денсаулық, буллинг және кибербуллинг, креативті ойлау, суицид, қаржылық сауаттылық сынды 9 бағыт бойынша арнайы дәріс өткізіп, оқушылармен жүйелі жұмыс жүргізді. Бұл жоба жастар тәрбиесінде оң нәтижесін көрсетеді деп сенемін», – деді.
Өткен оқу жылында қалаға қарасты 21 мектепте буллинг, суицид, ерте жүктілік, зорлау әрекеті сынды 62 оқиға тіркелді. Алдын-алу бойынша менторлар түрлі шаралар ұйымдастырып, кәсіби біліктілікті арттыру бойынша ментор, директор, орынбасарлар, психолог, әлеуметтік педагог сынды 55 адам арнайы курстан өтті. Кәсіби бағыт-бағдар жұмыстары бойынша оқушыларға СДУ, ҚБТУ, НАРХОЗ, ҚазҰУ, ҚазҰМУ, ҚазҰПУ сынды жоғары оқу орындарына экскурсция ұйымдастырылды. Ал арнайы дәрістерді қала әкімі Ернат Бәзілден бастап журналист Атсәлім Идигов, қоғам белсендісі Құрметбек Сансызбай, Сенат депутаттары Ғалиасқар Сарыбаев пен Амангелді Төлемісов, Мәжіліс депутаты Болат Керімбек, спортшы Мерей Сүйінов, тележүргізуші Нұрсұлтан Құрман сияқты елге белгілі жандар өткізді.
Жиында облыстағы ата-аналар комитетінің төрайымы Дәния Қыдырбаева сөз алып, менторларға және оларды қолдаған басшылыққа алғыс айтты. Жұмыс барысында айрықша көзге түскен ментор Бақтияр Жақсыгелдиев: «Тәрбие – шетсіз, бітпейтін майдан. Келешектің іргесін осы бастан дұрыстап қалап, оқушылардың қоғамнан өз орнын қалыптастыруға себепкер бола білген менторларға алғыс айтамын. Елеп-ескеріп, арнайы құрмет көрсетіп жатқандарға рақмет», – деді.
Ал басқосудың соңында өткен оқу жылында белсенді жұмыс атқарған менторлар қала әкімінің қолынан арнайы статуэтка мен Алғыс хат алды.
Серік ҚАНТАЙ
