Шараға аудан әкімі Алмас Абдинов, медицина саласының ардагерлері мен ауыл тұрғындары қатысты.
Жиында сөз алған аудан әкімі Алмас Сапарғалиұлы ауыл халқын көптен күткен қуанышымен құттықтап, бұл нысанның әлеуметтік маңыздылығына тоқталып:
– Жаңа медициналық нысан – ауыл тұрғындарының денсаулығын жақсартуға бағытталған нақты қадам. Мемлекет басшысы Қасым-Жомарт Тоқаевтың тапсырмасына сәйкес шалғай ауылдарда медициналық қызметтің қолжетімділігі артып келеді. Бұл халық игілігі үшін жасалып жатқан маңызды жұмыс, – деді.
Заманауи құрылғылармен жабдықталған амбулатория ауысымына 25 адамды қабылдай алады. Мұнда алғашқы медициналық көмек көрсетіліп, аналар мен балалардың денсаулығына айрықша көңіл бөлінеді. Жоба «Ауылдық денсаулық сақтауды жаңғыртудың» ұлттық жобасы аясында жүзеге асқан. Құрылыс жұмыстарын мердігер «Ритм Строй ЭК» ЖШС жүргізген. Техникалық қадағалаушы «Горизонт Строй Групп», ал авторлық қадағалаушы «Граждан проект ЗИ». Жалпы құрылыс құны 196,1 млн. теңге.
Жаңа фельдшерлік-акушерлік пункттің ашылуы ауыл тұрғындарының өмір сапасын арттыруға бағытталған игілікті іс.
Жыланды ауылында да тұрғындардың көптен күткен қуанышы – жаңа дәрігерлік амбулатория есігін айқара ашты. Ауысымына 25 адам қабылдауға қауқарлы медициналық мекеме мемлекеттік-жекеменшік әріптестік аясында бой көтеріп, ауыл халқының игілігіне қызмет етпек.
Заманауи талаптарға сай тұрғызылған ғимарат озық медициналық құрал-жабдықтармен қамтамасыз етілген. Мұнда білікті мамандар алғашқы көмек көрсетіп, тұрғындардың денсаулығын бақылауға алып, алдын алу шараларын жүйелі түрде жүргізбек. Ашылу салтанатында аудан әкімі Алмас Абдинов сөз сөйлеп, ауыл жұртшылығын маңызды нысанның іске қосылуымен құттықтады.
Жоба құрылысын «Enif Stroy» ЖШС жүзеге асырып, «RedmiPRO» ЖШС авторлық қадағалауды атқарған. Жыланды жұрты енді сапалы медициналық көмекке қол жеткізіп, дәрігер қызметін өз ауылынан-ақ алатын болды.
Рысалды ШАРАПИЕВА
