Мейірбикелер күні медицина тарихында із қалдырған Флоренс Найтингейлдің құрметіне аталып өтеді. Ол науқастарға күтім жасаудың жаңа жолын қалыптастырып, мейірбикелік істің негізін қалаған тұлға. Осы ретте Талдықорғанда Халықаралық медбикелер күніне арналған салтанатты іс-шара ұйымдастырылды. Кәсіби мерекеде жетісулық фельдшер-акушер және өзге де медицина қызметкерлері ерен еңбегі мен мамандығына деген адалдығы үшін Құрмет грамотасымен және Алғыс хаттармен марапатталды.
Денсаулық сақтау саласындағы орта буын қызметкерлері – медицинаның жүрегіне айналған. Олардың төл мерекесінде облыстағы дәстүрлі байқаулар биыл да жалғасын тапты. Онда Мадина Найзабекова «Үздік акушер», Раушан Қазиева «Стационардың үздік медбикесі», Арай Ахметова «Бастапқы медициналық-санитарлық көмек көрсету ұйымының үздік медбикесі» және Азамат Құрамысов «Үздік фельдшер» номинациясын иеленіп, жеңімпаз атанды.
– Мен 16 жылдан бері «Жедел жәрдем» фельдшері болып қызмет істеп келемін. Жұмыс оңай емес. Түрлі оқиғаларға тап болып жатамыз. Адам жанының арашашысы болу әркімнің қолынан келе бермейді. Сондықтан да әріптестерімнің барлығы марапатқа лайық деп есептеймін. Жұмыстарына табыс тілеймін, – дейді «Жедел жәрдем» фельдшері Азамат Құрамысов.
Мерекелік жиында облыстық денсаулық сақтау басқармасының басшысы Асқар Садықов медицина қызметкерлерін мерекесімен құттықтап, ізгі тілегін арнады.
Медбикелердің кәсіби мерекесінде Жетісу өңірінің 5 медицина қызметкері ҚР Денсаулық сақтау министрінің Құрмет грамотасымен, тағы бесеуі Алғыс хатпен марапатталды.
Медбикелер – медицинаның негізгі күші, дәрігердің сенімді серігі. Бүгінде елімізде 200 мыңға жуық орта буын медицина қызметкері бар. Оның 80 пайызы мейіргер болып жұмыс істейді. Ал ауылдық жерлерде шамамен 55 мың маман еңбек етуде.
Медет ЖҰМАБАЙ
