Биыл ақиық ақын, қазақ поэзиясының мұзбалағы Мұқағали Мақатаевтың туғанына 94 жыл. Ақынның ғажайып өлеңдері жарты ғасыр өтсе де халықтың жан дүниесін тебірентпей қоймайды. Осыған орай Ілияс Жансүгіров атындағы Мәдениет сарайында «Армысыңдар, адамдар!» атты облыстық әншілер байқауы өтті.
Байқауға 16-35 жас аралығындағы жастар қатысты. Өңірлік әншілер сайысына 8 аудан мен 2 қаладан 20 әнші келді. Қатысушылар дәстүрлі және эстрадалық ән номинациялары бойынша сынға түсті. Күміскөмей әншілер тақырыпқа сай ақынның сөзіне жазылған әндерді шырқады. Өз бақтарын сынаған өнер иелерінің осалы жоқ. Әрқайсысы да жеңімпазға лайық. Ән мен жырға сусындатқан жас әншілер келген жұрттың көңілін тасытты.
– Биылғы додаға қатысушылардың деңгейі өте жоғары. Осындай әнсүйер, жырсүйер қауым бар кезде Мұқағали ақын ешқашан өлмейді, – дейді, облыстық халық шығармашылығы орталығы директорының орынбасары Қайрат Қазыкенұлы
Ән байқауының қорытындысында «Эстрадалық ән» номинациясы бойынша бас жүлдені Алакөл ауданының әншісі Ерасыл Қабдығалиев еншілесе, «Дәстүрлі ән» бөлімінде Кербұлақ ауданынан келген Ұлыхбан Нұрсабек бас жүлдеге қол жеткізді. Жеңімпазға ақшалай 300 мың теңгелік сертификат пен диплом табысталды.
Мұнан бөлек, І, ІІ, ІІІ орын алған жүлдегерлерге де ақшалай сыйлық пен дипломдар берілді.
Бір күнде Талдықорған қаласын ән мен жырға бөлеген өнер иелері көрерменнің көңілінде көпке дейін жүретіні сөзсіз. Мұқағали ақынның рухы шалқып, жастардың сырласына айналды десек артық айтқандық емес.
Санжар СҰЛТАНҒАЗЫ
