Белгілі ақын Мұхтар Шахановтың жары, ғылым мен білім саласына өлшеусіз үлес қосқан көрнекті ғалым әрі педагог Розалинда Әшірбайқызы Шаханова дүниеден өтті. Қайғылы хабарды Қазақ ұлттық қыздар педагогикалық университетінің баспасөз қызметі таратты.
«QyzPU Басқарма Төрағасы – Ректор Гүлмира Қанай университет ұжымы мен білім алушылары атынан белгілі ғалым, педагог Розалинда Әшірбайқызы Шаханованың қайтыс болуына байланысты туған-туыстары мен жақындарына көңіл айтады», – делінген ресми мәлімдемеде.
Өмір жолы мен ғылыми қызметі
Розалинда Шаханова 1951 жылы Павлодар қаласында дүниеге келген. 1974 жылы QyzPU-дың «Орыс тілі мен әдебиеті» мамандығын тәмамдап, бес жылға жуық орта мектепте мұғалім және тәрбиеші болып қызмет атқарған. 1990 жылы кандидаттық диссертациясын сәтті қорғап, 1993 жылы «Қазақ тілі мен әдебиеті» мамандығы бойынша екінші жоғары білім алған. Сол жылы доцент ғылыми атағына ие болды.
2004 жылы QyzPU-ға жұмысқа шақырылып, 2008 жылға дейін оқу-әдістемелік жұмыс жөніндегі проректор қызметін атқарды. Ол көптеген оқу құралдары мен ғылыми мақалалардың авторы, Қазақстанның білім беру жүйесінде терең із қалдырған тұлға болды.
Еңбектері мен марапаттары
Розалинда Әшірбайқызы білім мен ғылым саласындағы еңбегі үшін «ҚР Білім беру ісінің үздігі», «Жоғары оқу орнының үздік оқытушысы» секілді атақтармен және Ы. Алтынсарин, «Құрмет» медальдары, ҚР Ғылым және білім министрлігінің марапаттарымен марапатталған.
QyzPU университетімен өмірінің соңына дейін тығыз байланыста болып, жыл сайын мемлекеттік емтихан комиссиясына төрағалық етіп келді.
Жарқын бейне – мәңгі жадымызда
Ғылыми мұрасы мен ұстаздық жолы арқылы көптеген шәкірт тәрбиелеп өсірген Розалинда Әшірбайқызы Шаханованың есімі қазақстандық білім мен ғылым тарихында мәңгілік сақталады.
Марқұмның жатқан жері жарық, топырағы торқа болсын.
Фото: Қазақ ұлттық қыздар педагогикалық университетінің баспасөз қызметі
