Соңғы күндері әлемдік мұнай нарығында баға тұрақсыздығы күшейіп, жетекші мұнай маркалары айтарлықтай арзандады. Сарапшылардың пікірінше, бұл құбылыс бірнеше маңызды факторларға байланысты туындап отыр.
Астана уақытымен таңғы 08:25-тегі мәліметке сәйкес, Лондондағы ICE биржасында Brent маркалы мұнайдың маусым айына арналған фьючерстері 2,13 пайызға арзандап, барреліне 65,44 доллар деңгейінде тұрақтады. Ал WTI маркалы мұнайдың мамыр айына арналған келісімшарттары 2,09 пайызға құлдырап, 61,70 доллар болып тіркелді.
Мұнай бағасының төмендеуіне себеп болған негізгі факторлардың бірі — Иранның ядролық бағдарламасына қатысты келіссөздер. Егер тараптар нақты келісімге келсе, АҚШ-тың Иранға салған санкциялары жеңілдеуі мүмкін. Бұл жағдайда Иран мұнайы халықаралық нарыққа қайта шығып, ұсыныс көлемін арттырады. Қазіргі уақытта Иран мен АҚШ арасында үш раундтық келіссөздер өткен, ал төртінші кездесу алдағы сенбіге жоспарланған.
Сонымен қатар, сарапшылардың айтуынша, ОПЕК+ елдері мұнай өндіру көлемін арттыруы мүмкін деген болжам да нарыққа қысым жасап отыр. Бұл жаңалық инвесторлар арасында сенімсіздік туғызып, нарықтағы құбылмалы жағдайды күшейткен.
Мамандар мұнай нарығындағы жағдайдың алдағы күндері де құбылмалы болып қала беретінін айтады.
Фото: pixabay.com
